යහපාලන ආණ්ඩුවේදී එවකට අග්‍රාමාත්‍යවරයා වූ රනිල් වික්‍රමසිංහ මහතාගේ උත්සාහයෙන් ඇමෙරිකාවේ Millennium Challenge Corporation (MCC) වැඩසටහන තුළින් ඩොලර් මිලියන 415ක තෑගි මුදලක් ලංකාවට ලබා ගැනීමට අවස්ථාවක් තිබුණු බව එජාපයේ සභාපති වජිර අබේවර්ධන මහතා සඳහන් කර සිටියි.
සමහරුන්ගේ විරෝධතා හේතුවෙන් එය ක්‍රියාත්මක විය නොහැකි වූ බවත් ඔහු පවසා සිටියේය.
යක්කලමුල්ල කරාගොඩ ශ්‍රී දේවරක්ඛිත විහාරස්ථානයේ පැවැති ඇසළ කලාප විවෘත කිරීමෙන් අනතුරුව මාධ්‍ය වෙත අදහස් දක්වමින් අබේවර්ධන මහතා මෙලෙස පැවසිය.
“අද දිනයේදී රටේ ප්‍රධානම සාකච්ඡාව වනුයේ ඇමෙරිකානු බදු ප්‍රතිපත්තිය ගැනයි. 2015දී රනිල් වික්‍රමසිංහ මහතා මේ පිළිබඳ පැහැදිලි අවබෝධයක් ඇතිව MCC වැඩසටහන රටට හඳුන්වාදීමට උත්සාහ කළා. එවිට ලැබෙන්න තිබුණු ඩොලර් මිලියන 415ක තෑගි මුදලක් විරෝධතා හේතුවෙන් අහිමි වුණා,” යැයි ඔහු පැවසීය. ඔහු වැඩිදුරටත් කියා සිටියේ, එවකට ජනාධිපති මෛත්‍රීපාල සිරිසේන මහතා සහ අග්‍රාමාත්‍ය වික්‍රමසිංහ මහතා එකමුතුවින් මෙය ක්‍රියාත්මක කිරීමට අවසර දුන් නමි, ශ්‍රී ලංකාව ආසියාවේ පළමු බදු සහන සහිත රාජ්‍යය බවට පත්වනු ඇතැයිය. “එවකට කිසිදු ලාභයක් නොදැන, සමහරු MCC පිළිබඳ බියපත් කරමින් ව්‍යාජ තොරතුරු පැතිරුවා. දැන් තමයි ඉතිහාසයේ පාඩමක් ලැබෙන්නේ. අප ඒක ජනතාවට හරි ආකාරයට පැහැදිලි කරන්න බැරි වුණා. ඒ හේතුවෙන් අද ජනතාවට ලැබිය යුතු වාසි අහිමිවෙලා,”
“අද ඇමෙරිකානු බදු සියයට 44කින් 30කට අඩු වුණා කියලා කිව්වොත්, මම හිතන්නේ ඒක ලජ්ජාජනක කාරණයක්. මේ වගේ අවස්ථාවන්ට තේරුම් ගන්න පුළුවන් ජාත්‍යන්තර දේශපාලන අවබෝධය ඇති නායකයෝ තමයි රට පාලනය කරන්න ඕන,” යැයිද වජිර අබේවර්ධන මහතා සඳහන් කළේය.
