රවීන්ද්‍ර ජඩේජා මෝදිගේ භාරතීය ජනතා පක්ෂයෙන් දේශපාලනයට එයි

ඉන්දීය ක්‍රිකට් ක්‍රීඩක රවීන්ද්‍ර ජඩේජා භාරතීය ජනතා පක්ෂයට සම්බන්ධ වෙමින් දේශපාලනයට පිවිස තිබේ.

ඔහුගේ බිරිඳ රිවාබා ජඩේජා දැනටමත් භාරතීය ජනතා පක්ෂයේ ක්‍රියාකාරී සාමාජිකාවකි.

ජම්නගර් හි ව්‍යවස්ථාදායක සභාවේ මන්ත්‍රීවරයකු ලෙස භාරතීය ජනතා පක්ෂය නියෝජනය කරන රිවාබා ජඩේජා, X සමාජ මාධ්‍ය වේදිකාවේ සටහනක් තබමින් සිය සැමියාගේ දේශපාලන ප්‍රවේශය පිළිබඳ පුවත එළිදක්වා තිබිණි.

ඇය ඔවුන්ගේ භාරතීය ජනතා පක්ෂ නව සාමාජික කාඩ්පත ආඩම්බරයෙන් ප්‍රදර්ශනය කරන ඡායාරූප ද පළ කළාය.

සැප්තැම්බර් 2 වැනි දින ආරම්භ වූ ‘සදස්‍යට අභියන්’ නමින් හැඳින්වෙන භාරතීය ජනතා පක්ෂයේ සාමාජිකත්ව පිරිනැමීමේ ව්‍යාපාරය, අගමැති නරේන්ද්‍ර මෝදිගේ සාමාජිකත්වය අලුත් කිරීම මගින් සනිටුහන් විය.

රිවාබා 2019 දී භාරතීය ජනතා පක්ෂයට සම්බන්ධ වූ අතර 2022 දී ජම්නගර් සභා ආසනය සැළකිව යුතු පරතරයකින් ජයග්‍රහණය කළාය.

ක්‍රිකට් ක්‍රීඩාවේ තුන් ඉරියව් ක්‍රීඩකයකු ලෙස ප්‍රසිද්ධියට පත් රවින්ද්‍ර ජඩේජා, ජූනි මාසයේදී දකුණු අප්‍රිකාවට එරෙහිව ඉන්දියාව ලැබූ ඓතිහාසික T20 ලෝක කුසලාන ජයග්‍රහණයෙන් පසුව පසුගියදා T20 අන්තර්ජාතික තරඟවලින් විශ්‍රාම ගියේය.

ඔහු සිය T20 ක්‍රිකට් දිවියේ කෘතඥතාව සහ අභිමානය ප්‍රකාශ කරමින් ඉන්ස්ටග්‍රෑම් හි සිය විශ්‍රාම ගැනීම නිවේදනය කළේය.

ජඩේජා T20 තරග 74කට ක්‍රීඩා කර ලකුණු 515ක් සහ කඩුලු 54ක් දවාගෙන ඇත.