නිවැරදි දේශපාලනය හමුවේ ඩීල් දේශපාලනය තවදුරටත් වලංගු නොවන බව කොළඹ මහ නගර සභාවේ පුරපති තෝරා පත් කර ගැනීමේ ඡන්ද විමසීමෙන් නැවත වරක් තහවුරු වූ බව ජාතික ජන බලවේගය පවසයි.
එම පක්ෂයේ ජාතික විධායක කමිටු සාමාජික නියෝජ්‍ය අමාත්‍ය මහින්ද ජයසිංහ පැවසුවේ අදාළ ඡන්ද විමසීමේදී වෙනත් පක්ෂවල සහය ලබා ගැනීමට මුදල් ලබා දුන් බවට විපක්ෂය සිය පක්ෂයට එල්ල කරන චෝදනා ප්‍රතික්ෂේප කරන බවයි.
නෙත් නිවුස් සමග සාකච්ඡාවකට එක්වෙමින් නියෝජ්‍ය අමාත්‍යවරයා මේ බව සඳහන් කළේය.
කොළඹ නගරය ආසියාවේ අලංකාරවත්ම නගරයක් බවට පත් කිරීම සඳහා සැලසුමක් ක්‍රියාත්මක කරන බවද නියෝජ්‍ය අමාත්‍ය මහින්ද ජයසිංහ මෙහිදී කියා සිටියේය.
බස්නාහිර පළාත් පාලන කොමසාරිස් වරියට එරෙහිව සජබ නඩු මඟට
කෙසේවුවද, කොළඹ මහ නගර සභාවේ පුරපති තෝරා පත්කර ගැනීමට කටයුතු කළ අකාරය සම්බන්ධයෙන් විපක්ෂයෙන් දැඩි විවේචනයක් එල්ලවෙමින් තිබේ.
රාජ්‍ය පරිපාලන අමාත්‍යංශය මඟින් නිකුත්කළ පළාත් පාලන ආයතන ප්‍රධානීන් පත්කිරීමේ මාර්ගෝපදේශ නොතකා ඊට පටහැනි අයුරින් කොළඹ නගර සභාව තුළ කටයුතු කිරීම සම්බන්ධයෙන් බස්නාහිර පළාත් පාලන කොමසාරිස්වරිය වන සාරංගිකා කල්හාරී ජයසුන්දර ට එරෙහිව නීතිමය ක්‍රියාමාර්ග ගැනීම සඳහා සමගි ජන බලවේගය තීරණය කර ඇති බව වාර්තා වෙයි.
විපක්ෂ නායක සජිත් ප්‍රේමදාස ගේ ප්‍රධානත්වයෙන් ඊයේ (16) පස්වරුවේ පැවැති විශේෂ සාකච්ඡාව සඳහා පක්ෂයේ ජ්‍යෙෂ්ඨයන් සමග ජනාධිපති නීතිඥවරුන් රැසක් එක්ව සිටියේය.
එහිදී නීති උපදෙස් ලැබී ඇත්තේ පළාත් පාලන කොමසාරිස්වරිය නියමිත මාර්ගෝපදේශ අනුගමනය නොකරමින් රහස් ඡන්දයකට යාමට තීරණය කොට ඇති බවත්, ඒ අනුව ඇයට එරෙහිව අධිකරණමය ක්‍රියාමාර්ගයන්ට යොමුවිය හැකි බවත්ය.
එබැවින් ඉදිරි දින කිහිපය ඇතුළත මෙම නඩු පැවරීම සිදුකිරීමට තීරණය වී ඇති බව දැනගන්නට තිබේ.
එමෙන්ම ඊට විපක්ෂයේ අනෙකුත් පක්ෂ සම්බන්ධ කර ගැනීම සම්බන්ධයෙන් ද සාකච්ඡා කිරීමට ද එහිදී තීරණය වී ඇති බව ද වාර්තා වේ.
– the leader
