රාජ්‍ය සේවයේ බඳවා ගැනීම් ක්‍රියාවලිය සමාලෝචනය කිරීම සහ කාර්ය මණ්ඩල කළමනාකරණය කිරීම පිණිස පත්කරන ලද කමිටුවේ නිර්දේශ ක්‍රියාත්මක කිරීම යැයි කියමින් ගෙවී ගිය සති කිහිපයේදී රාජ්‍ය සේවය සඳහා 15,341ක් අලුතින් බඳවා ගැනීමට කැබිනට් මණ්ඩලය අනුමැතිය ලබාදී තිබේ.
ඒ යටතේ මාර්තු 10 වැනිදා පැවති කැබිනට් මණ්ඩල රැස්වීමේදී රාජ්‍ය සේවය සඳහා අලුතින් 5882ක් බඳවා ගැනීමට අනුමැතිය ලබා දී ඇත. පෙබරවාරි 19 වැනිදා පැවති කැබිනට් මණ්ඩල රැස්වීමේදී රාජ්‍ය සේවය සඳහා අලුතින් 2003ක් බඳවා ගැනීමට අනුමැතිය ලබාදී ඇති අතර පෙබරවාරි 09 වැනිදා පැවති කැබිනට් මණ්ඩල රැස්වීමේදී රාජ්‍ය සේවය සඳහා අලුතින් 7456ක් බඳවා ගැනීමට අවසර ලබාදී ඇත.
මෙම බඳවා ගැනීම් සඳහා නිර්දේශ ඉදිරිපත් කරනු ලබන්නේ රාජ්‍ය සේවයේ බඳවා ගැනීම් ක්‍රියාවලිය සමාලෝචනය කරමින් අවශ්‍යතා, ප්‍රමුඛතා හා කාලරාමු හඳුනාගෙන ඒ ආශ්‍රිතව අත්‍යවශ්‍යයෙන්ම සිදුකළ යුතු බඳවා ගැනීම් ප්‍රමාණයන් සම්බන්ධයෙන් අවශ්‍ය පියවර ගැනීම සඳහා අග්‍රාමාත්‍ය ලේකම්වරයාගේ ප්‍රධානත්වයෙන් පත්කරන ලද නිලධාරි කමිටුවක් මගිනි.
එම කමිටුව පත් කිරීම සඳහා 2024.12.30 දින කැබිනට් මණ්ඩල අනුමැතිය ලබාදී ඇති අතර ඊට අදාල යෝජනාව ඉදිරිපත් කර ඇත්තේ අග්‍රාමාත්‍ය හරිනි අමරසූරිය විසිනි.
එම කමිටුවේ කාර්ය වන්නේ අමාත්‍යාංශ විසින් එම අමාත්‍යාංශ යටතේ පවතින දෙපාර්තමේන්තු සහ අනෙකුත් ආයතනවල පවතින තනතුරු පුරප්පාඩු සම්පූර්ණ කිරීම සඳහා ඉදිරිපත් කරන ලද ඉල්ලීම් සැළකිල්ලට ගෙන නිර්දේශ ඉදිරිපත් කිරීමය.
මාර්තු 10 වැනිදා පැවති කැබිනට් මණ්ඩල රැස්වීමේදී අලුතින් බඳවා ගැනීම සඳහා අනුමැතිය ලබාදී ඇති පුරප්පාඩු සංඛ්‍යාව ප්‍රවාහන, මහාමාර්ග, වරාය සහ සිවිල් ගුවන් සේවා අමාත්‍යාංශයට 909ක්, කාන්තා හා ළමා කටයුතු අමාත්‍යාංශයට 109ක්, පරිසර අමාත්‍යාංශයට 144ක්, මහජන ආරක්ෂක සහ පාර්ලිමේන්තු කටයුතු අමාත්‍යාංශයට 2500ක්, අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශයට 22ක්, විද්‍යා හා තාක්ෂණ අමාත්‍යාංශයට 03ක්, මුදල්, ක්‍රම සම්පාදන සහ ආර්ථික සංවර්ධන අමාත්‍යාංශයට 185ක්, ධීවර, ජලජ සහ සාගර සම්පත් අමාත්‍යාංශයට 20ක්, රාජ්‍ය පරිපාලන, පළාත් සභා සහ පළාත් පාලන අමාත්‍යාංශයට 1615ක්, මධ්‍යම පළාත් සභාවට 72ක් හා ඌව පළාත් සභාවට 303ක් වශයෙන් සඳහන් කර ඇත.
පෙබරවාරි 19 වැනිදා පැවති කැබිනට් මණ්ඩල රැස්වීමේදී අලුතින් බඳවා ගැනීම සඳහා අනුමැතිය ලබාදී ඇති පුරප්පාඩු අමාත්‍යාංශ 11ක් හා පළාත් සභා 05 පවතින පුරප්පාඩු වශයෙන් සඳහන් කර ඇත. එහි වැඩිදුරටත් සඳහන් කර ඇත්තේ පුරප්පාඩු 4987ක් අතුරින් පුරප්පාඩු 2003ක් සඳහා බඳවා ගැනීමට කැබිනට් මණ්ඩල අනුමැතිය ලබාදුන් බවයි.
පෙබරවාරි 09 වැනිදා පැවති කැබිනට් මණ්ඩල රැස්වීමේදී අලුතින් බඳවා ගැනීම සඳහා අනුමැතිය ලබාදී ඇති පුරප්පාඩු සංඛ්‍යාව ගැන සඳහන් කර ඇත්තේ රාජ්‍ය පරිපාලන, පළාත් සභා සහ පළාත් පාලන අමාත්‍යාශයට 3000ක්, ආරක්ෂක අමාාත්‍යාංශයට 09ක්, විද්‍යා හා තාක්ෂණ අමාත්‍යාංශයට 179ක්, මුදල්, ක්‍රම සම්පාදන සහ ආර්ථික සංවර්ධන අමාත්‍යාංශයට 132ක්, අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශයට 400ක්, ප්‍රවාහන, මහාමාර්ග, වරාය සහ සිවිල් ගුවන් සේවා අමාත්‍යාංශයට 161ක්, සෞඛ්‍ය හා ජනමාධ්‍ය අමාත්‍යාංශයට 3519ක්, බස්නාහිර පළාත් සභාවට 34ක්, නැගෙනහිර පළාත් සභාවට 05ක් හා ශ්‍රී ලංකා මානව හිමිකම් කොමිෂන් සභාවට 17ක් වශයෙනි.
- අනිද්දා
