මැදපෙරදිග කලාපය පුරා පැතිර යන යුදමය තත්ත්වය හමුවේ ලෙබනනයට එල්ල වන ඊශ්රායල ප්රහාර හේතුවෙන් ජීවිතක්ෂයට පත් වූ සංඛ්යාව 850 දක්වා ඉහළ ගොස් ඇති බව ලෙබනන සෞඛ්ය අමාත්යාංශය අද (මාර්තු 15) තහවුරු කළේය. මාර්තු 2 වනදා ආරම්භ වූ මෙම නවතම යුධ ගැටුම්වලින් ගතවූ සති දෙකකට ආසන්න කාලය තුළ මෙම මරණ සංඛ්යාව වාර්තා වී තිබේ.
හිස්බුල්ලා සංවිධානය විසින් ඊශ්රායලයේ උතුරු ප්රදේශ ඉලක්ක කර රොකට් ප්රහාර එල්ල කිරීමත් සමඟ ඊශ්රායල ගුවන් හමුදාව ලෙබනනයේ දකුණු සහ නැගෙනහිර ප්රදේශවලට මෙන්ම බීරූට් අගනුවර ආසන්න ප්රදේශවලට ද දැවැන්ත ගුවන් ප්රහාර මාලාවක් දියත් කළේය. මෙම ප්රහාරවලින් මියගිය පිරිස අතර බහුතරයක් සිවිල් වැසියන් වන අතර තවත් දහස් සංඛ්යාත පිරිසක් තුවාල ලබා ඇති බව විදෙස් මාධ්ය වාර්තා පෙන්වා දෙයි.
පවතින ප්රහාර හේතුවෙන් දකුණු ලෙබනනයේ වැසියන් ලක්ෂ සංඛ්යාත පිරිසක් සිය නිවාස අතහැර ආරක්ෂිත ස්ථාන කරා පලා ගොස් ඇති අතර එම ප්රදේශවල දැවැන්ත මානුෂීය අර්බුදයක් නිර්මාණය වී තිබේ. ලෙබනන රජය ජාත්යන්තර ප්රජාවෙන් ඉල්ලා සිටින්නේ මෙම ප්රහාර වහා නතර කිරීමට මැදිහත් වන ලෙසයි. කෙසේ වුවද හිස්බුල්ලා සංවිධානයේ තර්ජන මුළුමනින්ම ඉවත් කරන තෙක් සිය මෙහෙයුම් නතර නොකරන බව ඊශ්රායලය අවධාරණය කරයි.
