මෙරට සිනමා ක්ෂේත්රයේ අසහාය සලකුණ වූ ආචාර්ය ලෙස්ටර් ජේම්ස් පීරිස් මහතා සිහිපත් කරමින් ජාතික චිත්රපට සංස්ථා භූමියේ ඉදි කිරීමට සැලසුම් කළ කෞතුකාගාරය සහ පුස්තකාල ව්යාපෘතිය මේ වන විට සම්පූර්ණයෙන්ම ඇනහිට ඇති බව ජාතික විගණන කාර්යාලය අනාවරණය කරයි. 2024 වසර සඳහා නිකුත් කළ නවතම විගණන වාර්තාවට අනුව මෙම ව්යාපෘතියේ ඉදිකිරීම් සහ උපදේශන කටයුතු වෙනුවෙන් රුපියල් කෝටි දහයකට ආසන්න මුදලක් වෙන් කර තිබියදීත් එහි ප්රගතියක් දක්නට නැත. විශේෂයෙන්ම 2019 වසරේදී මෙම කටයුතු ආරම්භ කිරීම සඳහා නාගරික සංවර්ධන අධිකාරියේ හෝ අමාත්ය මණ්ඩලයේ නිසි අනුමැතියක් නොමැතිව රුපියල් ලක්ෂ තිහකට අධික මුදලක් ගෙවා තිබීම බරපතළ මූල්ය අක්රමිකතාවක් ලෙස එම වාර්තාවේ පෙන්වා දී තිබේ.
මෙම ව්යාපෘතියේ අසාර්ථකත්වය පිළිබඳව පොදු ව්යාපාර පිළිබඳ පාර්ලිමේන්තු කාරක සභාව හෙවත් කෝප් කමිටුවේදී ද දැඩි අවධානයක් යොමු වී ඇති අතර එහිදී ජාතික චිත්රපට සංස්ථාවේ පවතින තවත් මූල්ය දුර්වලතා රැසක් හෙළි වී ඇත. සංස්ථාව විසින් විවිධ චිත්රපට නිෂ්පාදකයන්ට සහ සිනමා ශාලා වෙත ලබා දුන් රුපියල් කෝටි පනහකට ආසන්න ණය මුදල් සහ හිඟ මුදල් ප්රමාණයක් වසර විසිපහකට අධික කාලයක් තිස්සේ අය කර ගැනීමට අපොහොසත් වීම ඉන් ප්රධාන කරුණකි. රජයේ මුදල් අය කර ගැනීම සම්බන්ධයෙන් පවතින මෙම දැඩි උදාසීනත්වය මගින් ආයතනයේ මූල්ය ස්ථාවරත්වයට දැඩි බලපෑම් එල්ල වී ඇති බව අභ්යන්තර ආරංචි මාර්ග සඳහන් කරයි.
මීට අමතරව චිත්රපට ආනයනය, බෙදාහැරීම සහ ලියාපදිංචි කිරීමේ ක්රියාවලිය විධිමත් කිරීම සඳහා රුපියල් එක්කෝටි පනස් ලක්ෂයක පිරිවැයකින් පරිගණක පද්ධතියක් ස්ථාපනය කිරීමට සැලසුම් කර තිබුණ ද එය ද මෙතෙක් ක්රියාත්මක වී නොමැත. 2025 වසරේ මැයි මස වන විටත් එම පද්ධතිය ස්ථාපනය කර නොතිබූ පසුබිමක ඒ වෙනුවෙන් රුපියල් ලක්ෂ තිහකට අධික මුදලක් ගෙවා තිබීම විගණන විමර්ශනවලදී තහවුරු වී තිබේ. 2018 වසරේදී අභාවප්රාප්ත වූ ලෙස්ටර් ජේම්ස් පීරිස් මහතාගේ නාමය අනුස්මරණය කිරීමට ගත් උත්සාහය මෙලෙස පරිපාලන සහ මූල්ය දූෂණ හේතුවෙන් අතරමග නතර වීම සිනමා ලෝලීන්ගේ දැඩි කණගාටුවට හේතු වී ඇත.
