මූල්ය වංචා සිදුකිරීමේ චෝදනා මත අපරාධ පරීක්ෂණ දෙපාර්තමේන්තුවේ (CID) මූල්ය අපරාධ විමර්ශන ඒකකය මගින් අත්අඩංගුවට ගෙන රක්ෂිත බන්ධනාගාරගත කර සිටි පාසල් ගුරුවරියක, තමන් ද සූක්ෂ්ම ෆේස්බුක් ජාලයක වංචාවකට හසුවූ තැනැත්තියක බව කොළඹ ප්රධාන මහේස්ත්රාත් අසංක එස්. බෝධිරාගම මහතා හමුවේ ප්රකාශ කර සිටියාය.
රුපියල් ලක්ෂ ගණනක මුදල් වංචා කිරීමේ සහ පුද්ගලයන් බියගන්වා මුදල් ලබාගැනීමේ චෝදනාව මත මෙම සැකකාරිය අත්අඩංගුවට ගෙන තිබුණි. කෙසේ වෙතත්, තමන් කිසිදු සෘජු වංචාවකට සම්බන්ධ නොමැති බවත්, සමාජ මාධ්ය හරහා ලැබුණු රැකියා අවස්ථාවකට ප්රතිචාර දැක්වීමෙන් පසු තමන් නොදැනුවත්වම මෙම ජාලයට හසුවූ බවත් ඇය අධිකරණයට දන්වා සිටියාය.
ඇයගේ ප්රකාශයට අනුව, දිනකට විශාල මුදලක් ගෙවන බව පවසමින් ෆේස්බුක් ඔස්සේ පණිවිඩයක් ලැබී තිබේ. එම රැකියාව සඳහා ඇයගේ බැංකු ගිණුම් අංකය ලබා දෙන ලෙස දැන්වීම්කරු ඉල්ලා ඇති අතර, ඉන් පසුව ඇයගේ ගිණුමට මුදල් එවනු ලබන බවත්, ඒවා ලබාදෙන වෙනත් ගිණුම් අංක වෙත මාරු කරන ලෙසත් ඇයට උපදෙස් ලැබී ඇත. ඒ අනුව ක්රියා කළ තමන්, සැබෑ වංචාකරුවන් විසින් ‘බළල් අතක්’ ලෙස භාවිතා කර ඇති බවත් තමන් නිර්දෝෂී බවත් ඇය අවධාරණය කළාය.
මෙහිදී අපරාධ පරීක්ෂණ දෙපාර්තමේන්තුව අධිකරණයට පෙන්වා දුන්නේ මෙවැනි සංවිධානාත්මක කල්ලි ෆේස්බුක් සහ යූටියුබ් (YouTube) ඔස්සේ ක්රියාත්මක වෙමින් අහිංසක පුද්ගලයන් යොදාගෙන මෙවැනි මූල්ය වංචා සිදුකරන අවස්ථා රාශියක් මීට පෙරද වාර්තා වී ඇති බවයි.
ඉදිරිපත් වූ කරුණු සලකා බැලූ මහේස්ත්රාත් අසංක එස්. බෝධිරාගම මහතා, මෙම මහා පරිමාණ වංචාව පිටුපස සිටින සැබෑ මහමොළකරුවන් අත්අඩංගුවට ගැනීමට පුළුල් විමර්ශනයක් පවත්වන ලෙස අපරාධ පරීක්ෂණ දෙපාර්තමේන්තුවට නියෝග කළේය. වැඩිදුර විමර්ශන කටයුතු ජූනි මස 5 වැනිදා දක්වා කල් තැබිණි.
