පසුගිය දිනවල පැවැති අයහපත් කාලගුණික තත්ත්වය හේතුවෙන් මහ කන්නයේ වගා කරන ලද වී ඇතුළු වගාවන්ට සිදුවූ හානිය සඳහා ගෙවිය යුතු වන්දි මුදල දළ වශයෙන් රුපියල් මිලියන 1,000 ත් 1,200 අතර බවට ගණන් බලා තිබෙන බවත්, ලබන වසරේ (2025) පෙබරවාරි මස මුල් සතියේදී අදාළ වන්දි මුදල් ගොවීන්ගේ ගිණුම්වලට බැර කරන බවත් කෘෂිකාර්මික හා ගොවිජන රක්ෂණ මණ්ඩලයේ සභාපති පේමසිරි ජාසිං ආරච්චි පැවසීය.
නොවැම්බර් මාසයේ සිට ඇද හැලුණු වැසි හේතුවෙන් කුඹුරු අක්කර 75,000 කට පමණ හානිවී තිබෙන බවද ඔහු කීවේය.
වන්දි ගෙවීමට අවශ්‍ය මුදල් මේ වනවිට මණ්ඩලයට ලැබී ඇතැයිද ඔහු පැවසීය.
එමෙන්ම ඉකුත් යල කන්නයේ ගංවතුර, නියඟ සහ වල් අලි උවදුරු හේතුවෙන් සිදුවූ වගා හානි සඳහා වන්දි මුදල් ලබන ජනවාරි මස 05 වැනිදා වනවිට ගෙවා අවසන් කිරීමට කෘෂිකාර්මික හා ගොවිජන රක්ෂණ මණ්ඩලය කටයුතු යොදා තිබේ. මේ වන විට එම ගොවීන්ගෙන් සියයට 80 කට පමණ රුපියල් මිලියන 80 ක වන්දි මුදලක් ගෙවා තිබෙන බවද සභාපතිවරයා කීවේය.
