රුමේනියාවේ වටිනාම ජාතික උරුමයක් ලෙස සැලකෙන වසර 2,500ක් පැරණි ‘Coțofenești’ රන් ශීර්ෂ ආවරණය (Helmet), ඕලන්දයේ (නෙදර්ලන්තයේ) කෞතුකාගාරයකින් සොරාගෙන වසරකට වැඩි කාලයකට පසුව යළි සොයා ගැනීමට සමත්ව තිබෙනවා. ක්රිස්තු පූර්ව 450 තරම් ඈත අතීතයකට දිවයන මෙම ඓතිහාසික රන් ශීර්ෂ ආවරණය සමඟ සොරාගත් රන් වළලු තුනෙන් දෙකක්ද ඊයේ (බ්රහස්පතින්දා) සන්නද්ධ පොලිස් ආරක්ෂාව මධ්යයේ නැවත ප්රදර්ශනය කරනු ලැබුවා. කෙසේ වෙතත් තෙවන රන් වළල්ල තවමත් සොයාගෙන නැහැ.ඕලන්දයේ ඇසෙන් (Assen) නුවර පිහිටි ඩ්රෙන්ට්ස් කෞතුකාගාරයට (Drents Museum) පුපුරණ ද්රව්ය භාවිත කරමින් කඩා වැදුණු සන්නද්ධ කල්ලියක් විසින් මෙම මංකොල්ලය සිදු කර තිබුණේ පසුගිය වසරේ ජනවාරි මාසයේදීය. රුමේනියාවේ ඉපැරණි ඩේසියානු (Dacian) ශිෂ්ටාචාරයට අයත් මෙම කෞතුක වස්තූන් සොරා ගැනීමත් සමඟ දෙරටේ රාජ්ය තාන්ත්රික සබඳතාවල පවා දැඩි උණුසුම් තත්ත්වයක් ඇති වූ අතර ඒ වෙනුවෙන් යුරෝ මිලියන 5.7 ක රක්ෂණ වන්දියක් ගෙවීමටද ඕලන්ද රජයට සිදු වුණා.අත්අඩංගුවට ගත් සැකකරුවන් තිදෙනාගේ නීතිඥයන් සමඟ සිදු කළ නීතිමය එකඟතාවලින් අනතුරුව මෙම පුරාවස්තූන් යළි බාර දී ඇති බවයි වාර්තා වන්නේ. කෞතුකාගාර අධ්යක්ෂ රොබට් වැන් ලැන්ග් ප්රකාශ කළේ සොරුන් අතින් බිම වැටීම නිසා රන් ශීර්ෂ ආවරණයට සුළු හානි සිදුව ඇති නමුත් එය සම්පූර්ණයෙන්ම යථා තත්ත්වයට පත් කළ හැකි බවයි. කෙසේ වෙතත් සොයාගත් අනෙක් රන් වළලු දෙක කිසිදු හානියක් නොමැතිව සුරක්ෂිතව පවතිනවා. මෙම වටිනා උරුමයන් හැකි ඉක්මනින් නැවතත් රුමේනියානු ජනතාව සතු කිරීමට කටයුතු කරන බව රුමේනියානු බලධාරීන් පවසා තිබෙනවා.
