මේ දිනවල පවතින දැඩි උණුසුම නිසා එළිමහනේ ගැවසීම හැකිතාක් සීමා කරන්නැයි රජයේ පවුල් සෞඛ්‍ය සේවා නිලධාරීන්ගේ සංගමය පවසා සිටියි.
ගර්භණී මව්වරුන්, කිරිදෙන මව්වරුන් අධික උෂ්ණත්වය පවතින අවස්ථාවන්හි දී එළිමහනේ රැඳී සිටීමෙන් වැළකිය යුතු බවත් පෙර පාසල් දරුවන් විවිධ ක්‍රීඩා සඳහා යෙදවීමෙන් වළකින ලෙසත් හැකි තරම් සෙවන ස්ථාන ප්‍රායෝගික ක්‍රියාකාරම් සඳහා තෝරා ගැනීමට ගුරුභවතුන් පියවර ගතයුතු බවත් එම සංගමය විසින් පවසා තිබේ.
එමෙන්ම උණුසුම හේතුවෙන් ශරීරයෙන් වැඩිපුර දහඩිය පිටවීම නිසා ‘තාප කම්පන’ තත්ත්වයට හෝ විජලනයන්ට ශරීරය පත්විය හැකි නිසා වෙනදාටත් වඩා ජලය පානය කරන්නැයි ද ඔවුන් අවධාරණය කළේ ය.
එමෙන්ම පවතින අධික උෂ්ණත්වයෙන් සිරුර වියැළීමේ අවදානමක් ඇති බැවින් පිරිසිදු ජලය, පලතුරු යුෂ, තැඹිලි වැනි දෑ පානය කරන ලෙසත් ඔවුන් ඉල්ලා සිටියි.
දරුවන්, ගර්භණී මව්වරුන්, කිරි දෙන මව්වරුන් හිරු එළියට නිරාවරණය වීම අනතුරුදායක බව පැවැසූ එම සංගමය මේ දිනවල ශීඝ්‍රයෙන් පැතිරී යන සෙම්ප්‍රතිශ්‍යා රෝගයෙන් ආරක්ෂාවීමට අවධානය යොමු කළ යුතු බව ද පැවසීය.
