අල්ලස් කොමිසමෙන් තමාට කැඳවීමක් ලැබී ඇති බව ජාතික නිදහස් පෙරමුණේ නායක විමල් වීරවංශ මහතා පවසනවා.
ඒ , ප්‍රකාශයක් ලබා ගැනීම සඳහායි.
ජනමාධ්‍ය ඔස්සේ අදහස් දක්වමින් ඔහු පැවසුවේ, නිවාස හා ඉදිකිරීම් අමාත්‍යවරයා ලෙස ධූරය දැරූ කාලය තුළදී ඇතැම් වෙළඳසැල් විකිණීම සම්බන්ධයෙන් විමර්ශන සිදුවෙමින් පවතින බවයි.
කෙසේවෙතත්, එම ලිපිය ඔවුන්ට ලැබීමට පෙර, ප්‍රකාශයක් සටහන් කරගැනීම සඳහා නව දිනයක් ප්‍රකාශයට පත්කරන බව සඳහන් කරමින් තවත් ලිපියක් නිකුත් කළ බව ඔහු පවසයි.
ඔහු තවදුරටත් පැවසූවේ, තමා හට ලබා දුන් පෙර සිරදඬුවම අතරතුර පොත් දෙකක් ද, සිතුවම් පහක් ද නිර්මාණය කර ඇති අතර, සිතුවම් තුනක් සම්පූර්ණ කර ඇති අතර, නැවත සිරගත වුවහොත් සිය කාලය ඒ ආකාරයෙන්ම හොඳින් භාවිත කරන බවයි.
ඒ පිළිබඳව වැඩිදුරටත් අදහස් දැක්වූ විමල් වීරවංශ මහතා :
” මට ලියුමක් ආවා අහවල් දිනේදී එන්න කියලා පරීක්ෂණයක් ගැන සඳහන් කරලා. මම නිවාස ඇමති හැටියට ඉන්න කාලයේ මොන සිද්ධියකට ප්‍රකාශයක් ගන්න. ඊට පස්සේ එයාලා යෝජනා කරපු දිනය එදා මට නඩු විභාගයකට යන්න උසාවි යන්න තිබ්බා. මම ඒ බව දන්වලා ලිපියක් ඇරියා, ඒ නිසා මට එන්න වෙන්නේ නැහැ කියලා. හැබැයි ඒ ලිපිය ඒගොල්ලොන්ට ලැබෙන්නට පෙර මට නැවත ලිපියක් ආවා,අර දන්නපු දිනයට එන අවශ්‍යයක් නැහැ, නැවත දිනයක් දන්වා එවන්නම් කියලා.ආය දිනයක් දන්වලා එවයි. එතකොට යනවා.
මෙහෙම ගියොත් නීතිඥවරයෙක් අරගෙන යන්න වෙයි. අපිට හුරුයි. අපි යහපාලන කාලයේත්,තාමත් බී වාර්තානෙ,නඩු පවරලා නැහැනේ. මාස තුනක් හිටිය රිමාන්ඩ් බන්ධානාගාරයේ..පොත් දෙකකුත් ලිව්වා. මේ තියෙන්නේ ඒක ඇතුලෙ ඉඳන් ඇඳපු චිත්‍ර. ඇතුලේ තව මාස දෙකක් විතර හිටියනම් චිත්‍ර ප්‍රදර්ශනයක් කරන්න ලෑස්ති වෙලා හිටියේ. ඉතින් මට ඒ කාලය දුන්නොත් මම ප්‍රයෝජනයක් ගන්නවා.ඒ කාලය නිකන් ගෙවන්නේ නැහැ”
