2024/25 මහ කන්නයේ වී ගොවීන් සඳහා හෙක්ටයාරයකට දුන් රුපියල් 15,000 පොහොර දීමනාව රුපියල් 25,000ක දක්වා වැඩි කරන ලෙස ජනාධිපති අනුර කුමාර දිසානායක මහතා විසින් මහා භාණ්ඩාගාරය වෙත උපදෙස් ලබා දෙයි.
එමෙන් ම, ධීවර ප්‍රජාවට ඉන්ධන සහනාධාරයක් ලබා දීමටත් තීන්දු කර ඇති අතර මෙම සහනාධාර ඔක්තෝබර් 1 වන දා සිට ක්‍රියාත්මක ය.
ඒ අනුව, මෙතෙක් හෙක්ටයාරයකට ලැබුණු රුපියල් 15,000ක පමණ වූ පොහොර සහනාධාර දීමනාව ඒ අනුව රුපියල් 25,000 දක්වා වැඩි වනු ඇත.
කාර්යක්ෂම හා ඵලදායී ලෙස එම සහනාධාරය ගොවීන් වෙත ලබා දීම සඳහා අදාළ මුදල් සෘජුව ම ගොවීන්ගේ බැංකු ගිණුම් වෙත ප්‍රේෂණය කිරීමට කටයුතු කෙරේ.
නිවැරැදි කෘෂි යෙදවුම් කළමනාකරණයක් අරමුණු කර ගනිමින් සාධාරණ මිලට පොහොර ඇතුළු කෘෂි යෙදවුම් ලබාදීම සහ යහපත් කෘෂිකාර්මික පිළිවෙත්වලට අනුව රසායනික හා කාබනික පොහොර ඇතුළු කෘෂි යෙදවුම් සඳහා සහනාධාර ලබා දීම පිළිබඳ නව රජයේ ප්‍රතිපත්ති ප්‍රකාශයේ සඳහන් කර තිබෙන අතර ඒ අනුව මෙම පියවර ගෙන ඇත.
මේ අතර, අඩාල වී ඇති ධීවර කර්මාන්තය නගාසිටුවා නිෂ්පාදන පිරිවැය අඩු කිරීමට ඔක්තෝබර් 1 වන දා සිට ක්‍රියාත්මක වන පරිදි ධීවර ප්‍රජාවට ඉන්ධන සහනාධාරයක් ලබා දීමට ද ජනාධිපතිවරයා විසින් මහා භාණ්ඩාගාරය වෙත උපදෙස් ලබා දී තිබේ.
ඒ අනුව, බහුදින හා එක්දින යාත්‍රා සඳහා ඉන්ධන සහනාධාරයක් මාසික පදනමින් ලබා දීමට කටයුතු කෙරේ.
මෙම සහනාධාරය ද සෘජුව ම ධීවරයන්ගේ බැංකු ගිණුම් වෙත ප්‍රේෂණය කරනු ඇත.
ධීවර කර්මාන්තය තිරසර හා පරිසර හිතකාමී ලෙස සංවර්ධනය හා කළමනාකරණය කිරීමටත්, ඒ තුළින් මත්ස්‍ය නිෂ්පාදනය සුලබ කිරීම හා පාරිභෝගිකයාට සාධාරණ මිලකට ලබා ගත හැකි තත්ත්වයකට පත් කිරීමත් කර්මාන්තයේ නියැලෙන්නන්ගේ ජීවන තත්ත්වය උසස් කිරීමත් පිළිබඳ නව රජයේ ප්‍රතිත්ති ප්‍රකාශයේ සඳහන් කර තිබේ.
ඒ අනුව, දැනට දැඩි පසුබෑමකට ලක් වී ඇති සමුද්‍රීය ධීවර කටයුතු යථාවත් කිරීම සඳහා මූල්‍ය හා තාක්ෂණික සහාය ලබා දීමට කටයුතු කරනු ඇත.
