නවෝත්පාදනය සහ ස්වභාවික සම්පත් නිසි ලෙස භාවිත කිරීම මගින් ගෝලීය මට්ටමින් ඉහළ දක්ෂතා දක්වන රටක් බවට පත්වීමේ පූර්ණ හැකියාව ශ්රී ලංකාව සතු බව ශ්රී ලංකාවේ තුර්කි තානාපති සෙමිහ් ලුට්ෆු තුර්ගුට් (Semih Lütfü Turgut) මහතා පවසයි. ලෝක ඉතිහාසයේ සාර්ථක වූ බොහෝ ජාතීන් තමන් සතු සීමිත සම්පත් උපායමාර්ගිකව කළමනාකරණය කරමින් තම ශක්තියට වඩා වැඩි බලපෑමක් ලෝකයට එල්ල කර ඇති බව පෙන්වා දුන් තානාපතිවරයා, ශ්රී ලංකාවට ද එවැනි ගමනක් යා හැකි බව අවධාරණය කළේය. නවෝත්පාදනය යනු ඕනෑම කුඩා ජාතියකට සිය ශක්තීන් කිහිප ගුණයකින් වැඩිකර ගැනීමට ඇති ප්රධානතම මෙවලම බවත්, ශ්රී ලංකාවේ පවතින උපායමාර්ගික භූගෝලීය පිහිටීම, පොහොසත් සංස්කෘතික උරුමය සහ වර්ධනය වෙමින් පවතින ව්යවසායකත්ව අභිලාෂය රටේ ඉදිරි ගමනට මහඟු පිටුවහලක් වනු ඇති බවත් ඔහු පෙන්වා දුන්නේය.
ගෝලීය වෙළඳාම යනු එක් පාර්ශවයක් පරාජය කර අනෙක් පාර්ශවය ජයග්රහණය කරන ක්රියාවලියක් නොවන බවත්, තම ශක්තීන් නිවැරදිව හඳුනාගෙන කටයුතු කිරීමෙන් කුඩා රටවලට වෙළඳ ලෝකය තුළ ප්රබල බලපෑමක් ඇති කළ හැකි බවත් තානාපතිවරයා වැඩිදුරටත් සඳහන් කළේය. තුර්කියේ සංවර්ධන ගමන් මග පිළිබඳව උදාහරණ දක්වමින් ඔහු පවසා සිටියේ භූගෝලීය වාසි මෙන්ම අධිෂ්ඨානය, නිර්මාණශීලිත්වය සහ ජාත්යන්තර හවුල්කාරිත්වය සාර්ථකත්වයේ රහස වන බවයි. ශ්රී ලංකාව තම සුවිශේෂී දක්ෂතා ඔස්සේ ඉදිරියටම යනු ඇතැයි තමා විශ්වාස කරන බවත්, තුර්කිය සහ ශ්රී ලංකාව අතර පවතින ද්විපාර්ශ්වික සබඳතා සහ සහයෝගීතාව තවදුරටත් ගැඹුරු කිරීමට තමා කැපවන බවත් තුර්කි තානාපතිවරයා ප්රකාශ කළේය.
