ශ්රී ලංකා ජාතික ක්රිකට් කණ්ඩායම ඇතුළු සියලුම ජාතික කණ්ඩායම්වල කාර්ය සාධනය ඉහළ නැංවීමේ අරමුණින් නව විදේශීය පුහුණුකරුවන් දෙදෙනෙකු පත් කිරීමට ශ්රී ලංකා ක්රිකට් ආයතනය පියවර ගෙන තිබේ. ඒ අනුව ජාතික පන්දු යැවීමේ පුහුණුකරු ලෙස රයන් වෑන් නීකර්ක් (Ryan van Niekerk) සහ ජාතික දඟ පන්දු හා පන්දු රැකීමේ පුහුණුකරු ලෙස ජෝර්ඩන් ග්රෙගරි (Jordan Gregory) පත් කර ඇත. වසර දෙකක කාලසීමාවක් සඳහා බලපැවැත්වෙන මෙම පත්වීම් ලබන අප්රේල් මස 15 වැනිදා සිට නිල වශයෙන් ක්රියාත්මක වීමට නියමිත බව ක්රිකට් ආයතන ආරංචි මාර්ග තහවුරු කරයි.
ජාතික පන්දු යැවීමේ පුහුණුකරු ලෙස පත් වූ රයන් වෑන් නීකර්ක්, 2023 සිට 2026 දක්වා නෙදර්ලන්ත ජාතික කණ්ඩායමේ පන්දු යැවීමේ සහ අතුරු ප්රධාන පුහුණුකරු ලෙස කටයුතු කළ අත්දැකීම් බහුල පුද්ගලයෙකි. 2023 ලෝක කුසලානය සහ 2024, 2026 විස්සයි-20 ලෝක කුසලාන තරගාවලි සඳහා නෙදර්ලන්ත කණ්ඩායම සූදානම් කිරීමේදී ඔහු දැක්වූ දායකත්වය සුවිශේෂී වේ. ඔහුගේ නව භූමිකාව යටතේ ශ්රී ලංකා වේග පන්දු බලඇණිය ජාත්යන්තර මට්ටමට ඔසවා තැබීමේ ප්රධාන වගකීම ඔහුට පැවරී තිබේ.
එසේම, ජෝර්ඩන් ග්රෙගරි උසස් කාර්ය සාධන මධ්යස්ථානය යටතේ සියලු ජාතික කණ්ඩායම්වල දඟ පන්දු යැවීම සහ පන්දු රැකීමේ අංශ භාරව කටයුතු කරනු ඇත. නෙදර්ලන්ත ක්රිකට් ආයතනයේ පන්දු රැකීමේ උපදේශකයෙකු ලෙස කටයුතු කර ඇති ඔහු, ජාත්යන්තර මට්ටමේ ද්විපාර්ශ්වික තරගාවලි රැසක අත්දැකීම් සහිත පුහුණුකරුවෙකි. ශ්රී ලංකා කණ්ඩායමේ පන්දු රැකීමේ දුර්වලතා මගහරවා ගනිමින් දඟ පන්දු යවන්නන්ගේ දක්ෂතා ඔප්නැංවීමට ඔහුගේ පැමිණීම විශාල ශක්තියක් වනු ඇති බව ක්රිකට් විචාරකයෝ විශ්වාසය පළ කරති.
