ශ්‍රී ලංකා ක්‍රීඩිකාවෝ ඉරිදා තරග බිමට

වයස 19 න් පහළ කාන්තා විස්සයි-20 ක්‍රිකට් ලෝක කුසලාන තරගාවලියට සහභාගිවී සිටින ශ්‍රී ලංකා යොවුන් කාන්තා කණ්ඩායම එළඹෙන ඉරිදා (19 වැනිදා) සත්කාරක මැලේසියාවට එරෙහිව ශ්‍රී ලංකා වේලාවෙන් පෙරවරු 10.30 ට තරග බිමට පිවිසීමට සූදානමින් සිටියි. 

සෙනසුරාදා ආරම්භ වන මෙම තරගාවලිය පෙබරවාරි මස 2 වැනිදා දක්වා ක්‍රීඩාංගණ 4 කදී පැවැත්වේ.

තරගාවලියට සහභාගි වන කණ්ඩායම් 16 ටම තරගාවලිය ආරම්භ වීමට පෙර පෙරහුරු තරග 2 කට බැගින් ක්‍රීඩා කිරීමට අවස්ථාව හිමිවිය. පෙරහුරු තරගවලදී බංග්ලාදේශ යොවුන් කාන්තා කණ්ඩායම හමුවේ පරාජයට පත්වූ ශ්‍රී ලංකා යොවුන් ක්‍රීඩිකාවෝ, සැමෝවා යොවුන් කාන්තා කණ්ඩායමට එරෙහිව ජය වාර්තා කිරීමට සමත් වූහ.

මනුදි නානායක්කාරගේ නායකත්වයෙන් සමන්විත ශ්‍රී ලංකා යොවුන් කාන්තා කණ්ඩායම, 2024 යොවුන් ආසියානු කුසලාන තරගාවලියේ සිවුවැනි ස්ථානයට පත්වීමෙන් අනතුරුව ලෝක කුසලාන තරගාවලියට සහභාගි වී සිටියි. ‘ඒ’ කාණ්ඩය යටතේ මෙම තරගාවලියට එක්ව සිටින ශ්‍රී ලංකා යොවුන් කණ්ඩායම මූලික වටයේදී සෙසු තරගවලදී ඉන්දියාවට සහ බටහිර ඉන්දීය කොදෙව් පිලට එරෙහිව තරග වැදීමට නියමිතය.

තරගාවලියේ මූලික වටය එක් කාණ්ඩයකට කණ්ඩායම් 4 බැගින් වූ ‘ඒ’, ‘බී’, ‘සී’ සහ ‘ඩී’ යන කාණ්ඩ 4 යටතේ පැවැත්වෙන අතර සෑම කාණ්ඩයකම පළමු ස්ථාන 3 ට පත්වන කණ්ඩායම් තරගාවලියේ සුපිරි 6 දෙනාගේ වටයට පිවිසෙනු ඇත. සුපිරි 6 දෙනාගේ වටය කණ්ඩායම් 6 බැගින් වූ කොටස් දෙකක් යටතේ පැවැත්වීමට නියමිතය.

සුපිරි 6 දෙනාගේ වටයේදී ‘ඒ’ සහ ‘ඩී’ කාණ්ඩවල කණ්ඩායම් පළමු කොටස යටතේද, ‘බී’ සහ ‘සී’ කාණ්ඩවල කණ්ඩායම් දෙවැනි කොටස යටතේ තරග වදිනු ඇත. එම කොටස් දෙකේ මුල් ස්ථාන දෙක හිමිකර ගන්නා කණ්ඩායම් 4 තරගාවලියේ අවසන් පූර්ව වටයට පිවිසෙන අතර එතැන් සිට තරගාවලිය පිළිමළුන් පිටුදැකීමේ ක්‍රමයට අනුව පැවැත්වේ.

තරගාවලියේ මූලික වටයේ තරග මෙම මස 18 වැනිදා සිට 23 වැනිදා දක්වා පැවැත්වෙන අතර සුපිරි 6 දෙනාගේ වටයේ තරග 25 වැනිදා සිට 29 වැනිදා දක්වා පැවැත්වේ. අවසන් පූර්ව තරග 31 වැනිදා පැවැත්වෙන අතර අවසන් මහ තරගය පෙබරවාරි 2 වැනිදා පැවැත්වීමට කටයුතු යොදා තිබේ. අවසන් පූර්ව සහ අවසන් මහ තරගය පැවැත්වීමට නියමිතව ඇත්තේ පන්ඩමාරන් ක්‍රීඩාංගණයේදීය.

පන්ඩමාරන් ක්‍රීඩාංගණයේදී හැරුණු කොට ජොහෝර්, බංගි සහ සරාවක් යන ක්‍රීඩාංගණවලදීද මෙම තරගාවලියේ තරග පැවැත්වෙන අතර මැලේසියානු වේලාවෙන් පෙරවරු 8.00 ට සහ මධ්‍යහන 12.00 ට ආරම්භ වන එම තරග ශ්‍රී ලංකා වේලාවෙන් නැරඹිය හැකි වන්නේ පෙරවරු 10.30 සහ පස්වරු 2.30 සිටය.