මෙවර ලෝක ටෙස්ට් ශූරතා තරගවාරයේ අවසාන මහා තරගය සඳහා සුදුසුකම් ලබාගැනීමේ අවස්ථාවක් සහිත දෙරටක් වන ශ්‍රී ලංකාව සහ දකුණු අප්‍රිකාව අතර ටෙස්ට් තරගාවලිය අද (27 වැනිදා) ශ්‍රී ලංකා වේලාවෙන් පස්වරු 1.00ට ආරම්භ වීමට නියමිතය. ඩර්බන් නුවර කිංග්ස්මීඩ් ක්‍රීඩාංගණයේදී ආරම්භ වන මෙම තරගාවලියේ ප්‍රතිඵල මත ශ්‍රී ලංකාවේ, දකුණු අප්‍රිකාවේ පමණක් නොව ලෝක ටෙස්ට් ශූරතා අවසන් තරගයට මාන බලන කණ්ඩායම් තුනකම ඉරණම තීන්දු වීමද විශේෂත්වයකි.
දෙරට අතර අවසන් වරට පැවැති ටෙස්ට් තරග 4ම දකුණු අප්‍රිකාවේ පවත්වා තිබෙන අතර මින් තරග දෙකක ජය ශ්‍රී ලංකාවට හිමි වී තිබීම, මෙම තීරණාත්මක තරගාවලියට සහභාගී වන ශ්‍රී ලංකා කණ්ඩායමට සැහැල්ලුවක් වනු ඇත. එමෙන්ම අද තරගය පැවැත්වෙන ඩර්බන් ක්‍රීඩාංගණයේ ශ්‍රී ලංකාව අවසන් වරට 2019 තරග වැදි අතර එහිදී කුසල් ජනිත් වාර්තා කළ සියවසේ හොඳම ඉනිමත් සමගින් අති විශිෂ්ට ජයක් ශ්‍රී ලංකාවට හිමි වීමද විශේෂත්වයකි. එමෙන්ම අදාළ තරගයේ ක්‍රීඩා කළ ක්‍රීඩකයන් සත් දෙනෙක්ම ශ්‍රී ලංකා සංචිතයට නම් වී තිබීමද අත්දැකීම් අනුව ශ්‍රී ලංකාවට අමතර වාසියක් ගෙන දෙනු ඇත. එමෙන්ම 2019 වසරේදී මෙම ක්‍රීඩාංගණයේ පැවැති තරගයේදී කඩුලු 6ක් දවාගත් ලසිත් ඇඹුල්දෙණිය මෙවර ටෙස්ට් සංචිතයට නම් කොට තිබීමත් අදාළ තරගයේ කඩුලු 8ක් දවාගත් විශ්ව ප්‍රනාන්දු ඉතා හොඳ සූදානමකින් පසු වීමත් වසර 5කට පසු තවත් අසීරු ජයක් සොයන ශ්‍රී ලංකාවට ආශිර්වාදයක් වශයෙන් සැලකිය හැක.
තරගය ආරම්භ වන අද දිනයේදී සුළු වර්ෂාපතනයකින් තරගයට බාධා එල්ල වීමට ඉඩ ඇති බවටත් තරගයේ අනෙක් දින 4ට හොඳින් හිරු එළිය පතිත වී තරමක උණුසුම් කාලගුණ තත්ත්වයක් බලාපොරොත්තු විය හැකි බවටත් අනාවැකි පළ වී ඇත. මේ හේතුවෙන් තරගයේ පළමු දිනයේදී පන්දුව තරමක වැඩි දෝලනයක් පෙන්වීමේ ඉඩක් පවතියි. කෙසේ වෙතත් අද දිනයේ පළමු අර්ධයේ අවසන් පන්දුවාර කිහිපය වන විට තණතීරුව පිතිකරණයට වඩාත් යෝග්‍ය වනු ඇති බවටත්, අනතුරුව කඩුල්ල පළුදු වීම හේතුවෙන් දෙවන දිනයෙන් පසු දඟ පන්දුවට තරමක අවස්ථාවක් පවතිනු ඇති බවටත් අනාවැකි පළ වී තිබීම හේතුවෙන් අද කාසියේ වාසිය ජයග්‍රහණය කළහොත් ශ්‍රී ලංකා කණ්ඩායම පළමුවෙන් පන්දුවට පහර දීමට උත්සුක වනු ඇතැයි අනුමාන කළ හැක.
ශ්‍රී ලංකා ක්‍රිකට් ආරංචි මාර්ගයන්ට අනුව අද තරගයේදී ශ්‍රී ලංකා කණ්ඩායම වේග පන්දු යවන්නන් තිදෙනකු කණ්ඩායමට එක් කර ගැනීමේ ඉඩක් ඇත. මේ අනුව නවසීලන්තයට එරෙහිව ගාල්ලේ පැවැති දෙවන ටෙස්ට් තරගයට ක්‍රීඩා කළ කණ්ඩායමේ එක් වෙනස්කමක් පමණක් සිදු වනු ඇත. මේ අනුව බොහෝදුරට දකුණත් පිට දඟ පන්දු යවන ක්‍රීඩක නිශාන් පීරිස් විවේක ගන්වා විශ්ව ප්‍රනාන්දු හෝ ලහිරු කුමාර අද තරගය සඳහා කණ්ඩායමට නම් වීමේ ඉඩක් පවතියි.
ක්‍රීඩා කරනු ඇතැයි අපේක්ෂිත ශ්‍රී ලංකා කණ්ඩායම
පැතුම් නිස්සංක, දිමුත් කරුණාරත්න, දිනේශ් චන්දිමාල්, ඇන්ජෙලෝ මැතිව්ස්, කමිඳු මෙන්ඩිස්, ධනංජය ද සිල්වා, කුසල් මෙන්ඩිස්, මිලාන් රත්නායක, ප්‍රභාත් ජයසූරිය, ලහිරු කුමාර, අසිත ප්‍රනාන්දු
