මුදල් අච්චු ගැසීම නිසා රටේ උද්ධමනයේ වැඩිවීමක් සිදුනොවන බව ප්‍රවාහන නියෝජ්‍ය අමාත්‍ය වෛද්‍ය ප්‍රසන්න ගුණසේන මහතා පවසනවා.
රටේ ආර්ථිකය ස්ථාවර මට්ටමකට ගෙන උද්ධමනය පාලනය කිරීමට වර්තමාන ආණ්ඩුව පියවර ගෙන ඇති බවයි ඔහු පැවසුවේ.
ප්‍රවාහන නියෝජ්‍ය අමාත්‍ය වෛද්‍ය ප්‍රසන්න ගුණසේන මහතා,
“රටේ ආර්ථිකයට අවශ්‍ය ප්‍රමාණයට තමා මුදල් අච්චු ගැසීම වෙන්නේ. හැම අවුරුද්දකම වෙන එකක්. බලන්න තියෙන්නේ ආර්ථිකය ගමන් කරන දර්ශක එක්ක. පසුගිය අවුරුදුවල මාස 6ට සාපේක්ෂව අපි ආදායම් වියදම් පරතරය අඩුකරගෙන තියෙනවා 33%කට වඩා වැඩිපුර. ගිය අවුරුද්දේ පළවෙනි මාස 6 රාජ්‍ය ආදායම රු ත්‍රිලියන 1.8යි. මේ අවුරුද්දේ රු ත්‍රිලියන 2.3යි. 24.7%කින් ආදායම වැඩි කරලා. වියදම අඩුකරලා තියෙනවා. ඒ නිසා ආර්ථිකය ස්ථාවරයි කිසිම සැකයක් තියා ගන්න එපා.”
2014 වර්ෂයේ දී මෙරටට ආනයනය කරන ලද බස් රථ සඳහා නව එංජින් කට්ටල යොදා යළි ධාවනයට එක්කිරීමේ අවස්ථාවට එක්වෙමිනුයි නියෝජ්‍ය අමාත්‍යවරයා මෙලෙස පැවසුවේ.
මුදල් අච්චු ගැසිමේ දී උද්ධමනය වැඩිවීමක් සිදුවනවාද නැද්ද යන්න මාධ්‍යවේදියෙකු ඇසු ප්‍රශ්න හමුවේ ඔහු මෙසේ ද පැවසුවා.
“එහෙම නම් උද්ධමනය වැඩිවෙන්න එපැයි. ඔය කියන එක කාරණයක් ගැන හිතනවා නම් දැන් බඩු මිල වැඩිවෙන්න ඕනේ. නමුත් වැඩිවෙන්නේ නෑ. ස්ථාවර වෙලානේ. උද්ධමනය අඩු වෙලා තියෙනවා. කොටස් වෙළෙඳපොළ 20,000ක් දක්වා ගිහින් තියෙනවා ඉතිහාසයේ පළමු වතාවට. තනි තනි ඉලක්කම අරගෙන බෑ සමස්තයත් එක්ක සංසන්දනය කරන්න. සමස්තයත් එක්ක ගත්තහම ආර්ථිකය ස්ථාවරයි.”
