සහල් මාෆියාවට ඉඩ නොදී සහල් බෙදා හැරීම සඳහා සහන ක්‍රමයක් ඇති කිරීමට රජය පියවර ගත යුතු බව බත්තරමුල්ලේ සීලරතන හිමියෝ පවසනවා.
ජනසෙත පෙරමුණේ පක්ෂ කාර්යාලයේදී මාධ්‍ය හමුවේදී උන් වහන්සේ මේ බව සඳහන් කර සිටියා.
මෙහිදී වැඩිදුරටත් අදහස් දැක් වූ උන් වහන්සේ පැවසුවේ මෙලෙසයි.
“මේ වෙනකොට වෙළෙඳපොළේ කීරි සම්බා නැහැ කියලා ජනතාව චෝදනා කරනවා. සහල් මාෆියාවට ඉඩ දෙන්න එපා කියලා මම වෙළෙඳ ඇමැතිගෙන් ඉල්ලා සිටිනවා. මේ කීරි සම්බා මාෆියාවට ඉඩ දෙන්න එපා. සහල් මාෆියාවට ඉඩ දෙන්න එපා.ඒ වගේම ගොවි ජනතාවගේ ප්‍රශ්න හඳුනාගෙන ගොවියාට ප්‍රමුඛතාව දෙන්න රජය පියවර ගත යුතුයි.ගොවියාගේ කර උඩින් රජය පිහිටෙව්වත් ගොවීන්ට මේ වෙනකම් රජයෙන් කිසි සහනයක් දීලා නෑ කියලා ගොවියා චෝදනා කරනවා. කීරි සම්බා සහ අනෙකුත් සහල් සහන ක්රමයට දෙන්න පියවර ගන්න කියලා අපි රජයෙන් ඉල්ලනවා” යැයි කීහ.
