වහාම ක්‍රියාත්මක වන පරිදි සහල් පාලන මිල සංශෝධනය කිරීමට රජය අවසරදී ඇතැයි පැවැසෙයි. ඒ අනුව තෝරාගත් ප්‍රභේද සඳහා සහල් කිලෝ ග්‍රෑමයක් අලෙවි කළ හැකි උපරිම සිල්ලර මිල රුපියල් 10 කින් ඉහළ යනු ඇත.
වෙළඳපොළේ පවතින සහල් හිඟය සම්බන්ධයෙන් ජනාධිපති අනුර කුමාර දිසානායක මහතා සහ ප්‍රධාන වී මෝල් හිමියන් අතර පෙරේදා(07) පැවැති සාකච්ඡාවේදී පාලන මිල ඉහළ දමන ලෙස මහා පරිමාණ වී මෝල් හිමියන් කළ ඉල්ලීම සළකා බලමින් රජය මෙම තීරණයට එළැඹ තිබේ.
වෙළෙඳපොළට සැපයුම් සීමා කරමින් කෘතීම සහල් හිඟයක් වී මෝල් හිමියන් නිර්මාණය කළ බවට රජය පසුගිය සතියේදී චෝදනාවක් එල්ල කළ අතර ඒ හේතුවෙන් සහල් ආනයනය කිරීමේ තීරණය එළැඹීමට සිදුවූ බවද පැවැසුවේය.
නිෂ්පාදන පිරිවැය ඉහළ ගොස් ඇති බැවින් 2022 වර්ෂයේ ගැසට් කළ සහල් පාලන මිලට සහල් ලබාදිය නොහැකි බව වී මෝල් හිමියන් පසුගියදා පැවැති සාකච්ඡාවේදී රජයට පෙන්වා දුන් බව වෙළෙඳ හා වාණිජ ඇමැති වසන්ත සමරසිංහ මහතා පැවැසීය. ඒ අනුව නාඩු, සුදු සහල් සහ සම්බා යන ජනප්‍රිය සහල් වර්ග තුනක සිල්ලර මිල රුපියල් 10කින් ඉහළ යනු ඇති බවද සමරසිංහ මහතා ප්‍රකාශ කළේය.
සංශෝධිත මිල ගණන් පහත පරිදි වේ.
නාඩු කිලෝවක තොග මිල රු. 225 යි, සිල්ලර මිල රු. 230 යි (පෙර මිල රු. 220) සුදු සහල් කිලෝවක තොග මිල රු. 215යි, සිල්ලර මිල රු. 220යි (පෙර මිල රු. 210) සම්බා සහල් කිලෝවක තොග මිල රු. 235යි, සිල්ලර මිල රු. 240යි (පෙර මිල රු. 230). කීරි සම්බා කිලෝවක තොග මිල රු. 255 යි සිල්ලර මිල නොවෙනස්ව පවතී රු. 260 යි. ආනයනික නාඩු සහල් කිලෝවක සිල්ලර මිල රු. 220 යි.
වෙළඳපොළේ සහල් මිල පිළිබඳව ඉදිරි දින 10 තුළ සමීපව නිරීක්ෂණය කරන ලෙසත් සහල් මෝල් හිමියන් ස්ථාවර මිලට අනුකූලව කටයුතු කිරීමට අපොහොසත් වුවහොත් ඔවුන්ට එරෙහිව නීතිය දැඩිව ක්‍රියාත්මක කරන ලෙසත් ජනාධිපතිවරයා පාරිභෝගික කටයුතු පිළිබඳ අධිකාරියේ නිලධාරීන්ට උපදෙස් ලබාදී ඇති බවද පැවැසෙයි.
