පාකිස්තානයට බලපා ඇති දේශගුණික විපර්යාස නිසා ඇති වූ හදිසි ගංවතුර තත්වයක් හේතුවෙන් වයඹදිග පකිස්ථානයේ 300කට අධික පිරිසක් ජීවිතක්ෂයට පත්ව ඇති බව එරට මාධ්‍ය පවසනවා.
එම ගංවතුරෙන් විශාල පිරිසක් අතුරුදහන් වී ඇති බවයි වාර්තා වන්නේ.
ගම්මාන 10 ක් 12 ක් පමණ අර්ධ වශයෙන් වැළලී ගොස් ඇති බව එරට මාධ්‍ය පවසනවා.
කිෂ්ට්වාර් දිස්ත්‍රික්කයේ, චොසිටි ගම්මානයේ ජනතාව මේ හේතුවෙන් දැඩි පිඩාවට පත්ව තිබෙනවා.
ඔවුන් ගලවා ගැනීමේ කටයුතු අඛණ්ඩව සිදු කෙරුනා.
එම ප්‍රදේශය ආශිතව අවම වශයෙන් පුද්ගලයින් 60 දෙනෙකු මිය ගොස් ඇති බවට සැක පල කෙරෙනවා.
150 ක් පමණ තුවාල ලබා ඇති බවයි වාර්තා වන්නේ.
සිකුරාදා දින ඇද හැලුණු ධාරානිපාත වර්ෂාව සහ වලාකුළු පිපිරීම් හේතුවෙන් දැවැන්ත ගංවතුරක් ඇති ව තිබෙනවා.
ඉන් අනතුරුව කයිබර් පක්තුන්ක්වා පළාතේ කඳුකර දිස්ත්‍රික්කයක් වන බුනර් ප්‍රදේශයේ සිදු කළ සෝදිසි මෙහෙයුම්වලදී මල සිරුරු 54 ක් සොයා ගෙන ඇති බවයි වාර්තා වන්නේ.
එම ප්‍රදේශයේ 200කට අධික පිරිසක් තවමත් අතුරුදන්ව සිටිනවා.
බුනර් ප්‍රදේශයට හදිසියේ ඇද හැලුණු වර්ෂාව කොතරම් ප්‍රබලද යත් පදිංචිකරුවන්ට අනතුරු ඇඟවීමට පෙර ජලගැල්ම ඇති වූ බවයි බලධාරීන් ප්‍රකශ කර තිබෙන්නේ.
උතුරු පකිස්ථානයේ දුරස්ථ ගම්මානයක් වන කාදර් නගර් හි, විවාහ මංගල්‍යයක් සඳහා සැරසිලි සිදු කරමින් සිටියදී, නිවස හරහා මඩ සහ ජලය ගලා ගොස් තිබෙනවා.
විවාහ මංගල්‍යය සඳහා රැස්ව සිටි පවුලේ සාමාජිකයන් විසිඅට දෙනෙකු ඉන් මියගොස් ඇති බවයි වාර්තා වන්නේ.
පවතින කාලගුණ තත්වය හේතුවෙන් විනාශ වී ඇති වීදි සහ මාර්ග පිරිසිදු කිරීමට සති කිහිපයක් ගතවනු ඇති බව බලධාරීන් පවසනවා.
ඉන් අනතුරුව අලුත්වැඩියා කටයුතු ආරම්භ කිරීමට නියමිතයි.
යටිතල පහසුකම්වලටද විශාල ලෙස හානි සිදුව තිබෙනවා.
තවත් කුණාටු පැමිණෙන බවට ද අනතුරු ඇඟවීම් සිදු කර ඇති බවයි විදෙස් මාධ්‍ය වාර්තා කරන්නේ.
දිවි ගලවා ගත් පුද්ගලයන් සෙවීමේ කටයුතු අඛණ්ඩව ක්‍රියාත්මකයි.
ඉකුත් 26 වනදා සිට සාමාන්‍යය ප්‍රමාණයට වඩා මෝසම් වැසි ඇද හැලී තිබෙනවා.
එම කාල වකවානුවේ සිට මේ දක්වා 600 කට අදික පිරිසක් මිය ගොස් ඇති බවයි විදෙස් මාධ්‍ය වාර්තා කරන්නේ.
