හොරණ සිට කොළඹ (120 මාර්ගය) දක්වා ධාවනය වන සියලුම පෞද්ගලික බස් රථ ආරම්භ කළ වැඩ වර්ජනය අද (04) තෙවන දිනටත් ක්රියාත්මක වේ. හොරණ සිට කහතුඩුව අන්තර් හුවමාරුව හරහා පිටකොටුව දක්වා නව බස් රථයකට ධාවන බලපත්රයක් ලබා දීමට විරෝධය පළ කරමින් මෙම වර්ජනය ආරම්භ වූ අතර, මේ හේතුවෙන් කාර්යාල සේවකයින් ඇතුළු මගී ජනතාව දැඩි දුෂ්කරතාවට පත්ව සිටිති.
වර්ජනයේ නිරත බස් සංගම් සහ මාර්ගස්ථ මගී ප්රවාහන අධිකාරියේ සභාපතිවරයා අතර ඊයේ (03) පස්වරුවේ පැවති සාකච්ඡාව විසඳුමකින් තොරව අවසන් වී ඇත. වර්ජකයන්ගේ ඉල්ලීම් බලධාරීන් ප්රතික්ෂේප කිරීම හේතුවෙන් වර්ජනය අඛණ්ඩව පවත්වාගෙන යන බව බස් සංගම් දැනුම් දී තිබේ. මගී අවශ්යතා සපුරාලීම සඳහා ශ්රී ලංකා ගමනාගමන මණ්ඩලය (ලංගම) අතිරේක බස් රථ යොදවා ඇති නමුත්, එය ප්රමාණවත් නොවන බව මගීහු පවසති.
