හොරු අල්ලනවා යැයි කියන සටන් පාඨය තම තමන්ගේ වාසිය සඳහා ජනතාව මුලා කිරීමට දේශපාලන වේදිකාව වෙනුවෙන් නිර්මාණය කළ සටන් පාඨයක් බව ශ්‍රී ලංකා පොදුජන පෙරමුණේ ජනාධිපති ධුර අපේක්ෂක නාමල් රාජපක්ෂ පවසයි.

පහු පෙන්වා දුන්නේ එදා යහපාලන ආණ්ඩුව සමයේ ජනතා බදු මුදල් නාස්ති කරමින් ලොව පුරා ගොස් ගිණුම් පරීක්ෂා කරමින් රාජපක්ෂලාගේ ගිණුම්වල අයුතු ලෙස උපයාගත් කිසිවක් නොමැති බව සොයාගත් පිරිසම අද හොරු අල්ලන්න යැයි කියමින් ජනාධිපති අපේක්ෂකයන් වී ජනතාව ඉදිරියට පැමිණ ඇති බවයි.

නාමල් රාජපක්ෂ මේ අදහස් පළ කළේ මාතලේ ඊයේ පැවැති ජන රැලියක් අමතමිනි.

එහිදී වැඩිදුරටත් අදහස් දැක්වූ ඔහු තාක්ෂණය බද්ධ වූ ප්‍රසම්පාදන ක්‍රියාවලියක් ඔස්සේ විනිවිදභාවයෙන් යුතු තරගකාරී ටෙන්ඩර් පටිපාටියක් රටට හඳුන්වාදෙමින් දූෂණය වංචාව තවදුරටත් මැතිවරණ සටන් පාඨයක් වීම නවතා දමන බව කියා සිටියේය.

“දැන් බොහෝ වෙලාවට හොරු අල්ලන්න තමයි ජනාධිපතිවරු එන්නෙ. යහපාලන ආණ්ඩුවෙත් එහෙම්මම ආවා.කමිටුවකුත් දැම්මා. ඔය කියන හැමෝම එක කමිටුවකට එකතුවෙලා හොරු අල්ලන්නත් ගියා, නඩු පිට නඩු දැම්මා. ඒ හැම නඩුවකින්ම අපි නිදොස්කොට නිදහස් වුණා. වර්තමාන ජනාධිපතිවරයා, එවකට යහපාලන ආණ්ඩුවේ අගමැතිවරයා, පැහැදිලිව ප්‍රකාශයක් කළා ලෝකෙ වටේ ගිහිල්ලා රාජපක්ෂලාගේ ගිණුම් පිළිබඳව හෙව්වා. අයුතුලෙස උපයාගත්ත කිසි දෙයක් තියෙනවා කියලා සාක්ෂියක් නෑ කියලා. ඒ නිසයි ඒ අය නඩුවලින් නිදහස් වුණේ කියලා. හැබැයි ඒ හැම පරීක්ෂණයකටම වියදම් කළේ මේ රටේ ජනතාවගේ බදු මුදල්. සමහරවිට එයාලා ණයට ගත්ත රු.බිලියන 12.5 ගන්නත් ඇති.” යනුවෙන් ඔහු සඳහන් කළේය.

“ලැබ්බොගිනි හොයන්න අපේ ගෙවල්වල වැසිකිළිය පවා හෑරුවා.අපේ අම්මාගේ මොන්ටිසෝරියේ සෙල්ලම් හෙලිකොප්ටරයක් තිබුණා. ඒක බලන්නත් ආවනේ හෙලිකොප්ටරයක් කියලා. ඒ වගේ බොරුවෙන් ජනතාව මුලා කළ පිරිසක් තමයි මේ රටේ ආණ්ඩු කරන්න ඉල්ලන්නෙ. වංචාව දූෂණය මැතිවරණ වේදිකාවෙන් අපි අයින් කරනවා. අපි ඒක කරන්නෙ තාක්ෂණය හඳුන්වලා දීලා, ටෙන්ඩර් පටිපාටි ගෙනල්ලා. ප්‍රසම්පාදන ක්‍රියාවලියක් යටතේ තරගකාරී ලන්සු ක්‍රමයට ටෙන්ඩර් පටිපාටියක් හඳුන්වලා දීලා තාක්ෂණයත් එක්ක බද්දකර දීලා විනිවිදභාවය හා ගුණාත්මකභාවය ආරක්ෂාවන වැඩපිළිවෙළක් හඳුන්වාදෙනවා. අපි මතක තබාගන්න ඕනේ අපි ගනුදෙනු කරන්නෙ ලෝකයත් එක්ක. අපි ගනුදෙනු කරන්නෙ මේ රටේ මේ මාතෘභූමියෙ පය ගහලා ඉන්න මව්පියන්ගෙ දරුවන්ගෙ ආර්ථිකය සුරක්ෂිත කරන්න. තොරතුරු තාක්ෂණ ක්ෂේත්‍රයේ වෙන්න පුළුවන් අයෝජන,නිෂ්පාද හෝ සේවා අංශයේ වෙන්න පුළුවන්, විදේශ රැකියා අංශවල වෙන්න පුළුවන්. රැකියා ලක්ෂ 20ක් ඊළඟ අවුරුදු දහය තුළ ඔබේ දරුවා වෙනුවෙන් නිර්මාණය කිරීමේ අභියෝගය මම බාරගන්නවා කියන එක ඔබ තමුන්නාන්සෙලාට ප්‍රකාශ කරනවා,” යැයි ඔහු වැඩිදුරටත් පැවසීය.