ගිරාඳුරුකෝට්ටේ, රෝබේරිය ප්රදේශයේදී සිය බිරිඳට පෙට්රල් හලා ගිනි තබා බරපතල තුවාල සිදුකළ පුද්ගලයෙකු ඊයේ (27) ගිරාඳුරුකෝට්ටේ පොලිසිය විසින් අත්අඩංගුවට ගනු ලැබීය.
සැකකරු කන්කසන්තුරේ යුද හමුදා කඳවුරකට අනුයුක්තව සේවය කරන 42 හැවිරිදි සෙබළෙකු වන අතර, ඔහු සිද්ධියෙන් පසු පොලිසියට භාර වී තිබේ. පවුල් ආරවුලක් මෙම කෘර ප්රහාරයට හේතු වී ඇති බව පොලිස් විමර්ශනවලදී අනාවරණය වී ඇත.
සිය 12 හැවිරිදි දියණිය පාසල් වෑන් රථයකට නැංවීම සඳහා ත්රිරෝද රථයකින් රැගෙන යමින් සිටියදී, මඟ රැක සිටි සැකකරු ත්රිරෝද රථය නවත්වා දියණිය ඉවතට ඇද දමා බිරිඳට පෙට්රල් හලා ගිනි තබා තිබේ.
ප්රහාරයෙන් බරපතල පිළිස්සුම් තුවාල ලැබූ කාන්තාව මේ වන විට මහියංගනය රෝහලේ දැඩි සත්කාර ඒකකයේ ඉතා අසාධ්ය තත්ත්වයෙන් ප්රතිකාර ලබයි. ගිරාඳුරුකෝට්ටේ පොලිසිය සිද්ධිය සම්බන්ධයෙන් වැඩිදුර විමර්ශන පවත්වයි.
