රුපියල් මිලියන 15,823 වටිනා විදේශීය රාජ්‍ය ණය රාජ්‍ය මුල්‍ය ප්‍රකාශනවල ගිණුම්ගත කොට නොතිබූ බව ජාතික විගණන කාර්යාලයේ මගින් 2025/01/25 දින නිකුත් කොට ඇති නවතම විගණන වාර්තාවක සඳහන් වෙයි’
විදේශීය රාජ්‍ය ණය භාවිතා කිරීමට භාවිතා කරන පරිගණක පද්ධතියේ වාර්තාව සහ රාජ්‍ය මූල්‍ය ප්‍රකාශන සංසන්දනය කිරීමේදී 2023 වර්ෂයේ සැප්තැම්බර් 31 දින වන විට මෙකී විදේශීය ණය මුදල රජයේ මූල්‍ය ප්‍රකාශනවල ගිණුම් ගත කර නොතිබූ බවද එම විගණන වාර්තාවේ සඳහන් වෙයි. ගිණුම් ගත නොකළ විදේශීය ණය මුදල් භාවිතා කර දරා ඇති වියදම්ද 2023 වර්ෂයේදී ගිණුම්ගත කොට නොමැති බවද විගණනය මගින් අනාවරණය කර ඇත.
සියලු විදේශීය ණය ගිණුම්ගත කර අදාළ වියදම් නිවැරදිව සටහන් කළ යුතු බව විගණනය මගින් නිර්දේශ කොට ඇත. ගිණුම් ගත නොවූ විදේශීය ණය වටිනාකම මුළු විදේශීය ණය වටිනාකමින් 0.5% බවත් කළමනාකාරීත්වය විසින් විගණනයට සඳහන් කර ඇත.
විදේශීය ණය සම්බන්ධයෙන් අදාළ අමාත්‍යාංශ සහ දෙපාර්තමේන්තුව වෙත නිරන්තර උපදෙස් ලබා දෙමින් ඒවා ගිණුම්ගත කිරීමට කටයුතු සිදුකරන බව කළමනාකාරීත්වය විසින් වැඩිදුරටත් විගණනයට සඳහන් කර ඇත.
රජයේ මූල්‍ය ප්‍රකාශන සම්බන්ධයෙන් 2023 වර්ෂයට අදාළව නිකුත් කොට ඇති විගණන වාර්තාව මගින් මෙම තොරතුරු අනාවරණය කර ඇත.
