මැදපෙරදිග කලාපය පුරා යුද ගින්න වේගයෙන් පැතිර යමින් පවතින අතර, අද (02) දකුණු ඉරානයේ ෆාර්ස් (Fars) පළාත ඉලක්ක කර එල්ල වූ දරුණු ප්රහාරවලින් පුද්ගලයන් 35 දෙනෙකු මියගොස් ඇති බව විදෙස් මාධ්ය වාර්තා කරයි. මියගිය පිරිස අතර සිවිල් වැසියන් ද සිටින බවට වාර්තා පළ වන අතර, තුවාල ලැබූ සංඛ්යාව තවමත් නිශ්චිතව අනාවරණය වී නොමැත.
ඉරාකයේ කුර්දිස්තාන් ස්වයං පාලන කලාපයේ අගනුවර වන එර්බිල් (Erbil) නගරයෙන් ද ප්රබල පිපිරීම් හඬවල් වාර්තා වේ. ඉරාක ගුවන් ආරක්ෂක හමුදා පවසන්නේ එර්බිල් ජාත්යන්තර ගුවන්තොටුපළ ඉලක්ක කර එල්ල වූ මිසයිල සහ ඩ්රෝන ප්රහාර කිහිපයක් සාර්ථකව මැඩපැවැත්වීමට තමන් සමත් වූ බවයි. මෙම ප්රහාර ඉරාන හිතවාදී කණ්ඩායම් විසින් එල්ල කරන ලද බවට සැක කෙරේ.
ඇමෙරිකානු සහ ඊශ්රායල ඒකාබද්ධ ගුවන් ප්රහාර හේතුවෙන් ඉරානයේ උපායමාර්ගික මධ්යස්ථාන රැසකට දැඩි හානි සිදුවෙමින් පවතී. ෆාර්ස් පළාත යනු ඉරානයේ ප්රධාන හමුදා සහ කාර්මික මධ්යස්ථාන පිහිටි ප්රදේශයක් බැවින් මෙම ප්රහාර මගින් ඉරානයේ ආරක්ෂක ජාලයට දැඩි බලපෑමක් එල්ල වනු ඇතැයි ආරක්ෂක විශ්ලේෂකයෝ පෙන්වා දෙති.
කලාපය පුරා ජාත්යන්තර ගුවන්තොටුපළවල් ඉලක්ක වීමත් සමඟ ගුවන් ගමන් අවලංගු කිරීම් තවදුරටත් ඉහළ ගොස් ඇත. ඉරාකයේ සහ ඉරානයේ පවතින මෙම අවදානම් තත්ත්වය හමුවේ ශ්රී ලංකා විදේශ අමාත්යාංශය එරට වෙසෙන ශ්රී ලාංකිකයන්ට සිය ආරක්ෂාව පිළිබඳව දැඩි අවධානයෙන් පසුවන ලෙස නැවතත් දැනුම් දෙයි.
