බැංකොක් නුවර ක්වීන් සිරිකිට් ජාතික සම්මේලන මධ්යස්ථානයේදී පෙබරවාරි 22 සිට 26 දක්වා පැවැත්වෙන 73 වැනි බැංකොක් මැණික් හා ස්වර්ණාභරණ ප්රදර්ශනය (BGJF) සඳහා ශ්රී ලංකාව ඉතා සක්රීය දායකත්වයක් ලබා දෙමින් සිටියි. ලොව ප්රමුඛතම මැණික් ප්රදර්ශන හතරෙන් එකක් ලෙස සැලකෙන මෙම උළෙල, තායිලන්තයේ සිරින්වන්නාවරී නරිරතන රාජකන්යා කුමරියගේ ප්රධානත්වයෙන් උත්කර්ෂවත් ලෙස ආරම්භ විය. මෙවර ප්රදර්ශනය සඳහා ලොව පුරා සමාගම් 1,300 කට අධික සංඛ්යාවක් කුටි 2,800 කින් සහභාගී වී සිටින අතර, තායිලන්තයේ ශ්රී ලංකා තානාපති කාර්යාලයේ මැදිහත්වීම මත මෙරට සමාගම් 60 ක් ශ්රී ලංකා කුටිය (Sri Lanka Pavilion) යටතේ කුටි 75 ක් පුරා සිය නිෂ්පාදන ප්රදර්ශනය කරයි.
කර්මාන්ත හා ව්යවසායකත්ව සංවර්ධන අමාත්ය සුනිල් හඳුන්නෙත්ති, තායිලන්තයේ ශ්රී ලංකා තානාපති විජයන්ති එදිරිසිංහ සහ ජාතික මැණික් හා ස්වර්ණාභරණ අධිකාරියේ සභාපති එස්. පී. චාමින්ද යන මහත්ම මහත්මීන්ගේ සහභාගීත්වයෙන් ශ්රී ලංකා කුටිය විවෘත කෙරිණි. ලෝක ප්රකට සින්හල නිල් මැණික් (Ceylon Sapphires) ඇතුළු අනගි මැණික් වර්ග රැසක් මෙහිදී ප්රදර්ශනය කෙරෙන අතර, ශ්රී ලංකාවේ පෞරාණික උරුමය සහ විශිෂ්ට කර්මාන්ත ශිල්පීය හැකියාව ලෝකයට විදහා දැක්වීමට මෙය කදිම අවස්ථාවක් වී තිබේ. මීට අමතරව තායිලන්තයේ පදනම් වූ ශ්රී ලංකාවට අයත් සමාගම් 10 ක් පමණ ද මෙම ප්රදර්ශනයට එක්ව සිටීම විශේෂත්වයකි.
මෙම ප්රදර්ශනයට සහභාගී වීම හරහා තායිලන්තය සහ ආසියානු (ASEAN) කලාපය සමඟ පවතින වෙළඳ සබඳතා තවදුරටත් ශක්තිමත් කර ගැනීමටත්, ශ්රී ලංකාවේ මැණික් හා ස්වර්ණාභරණ සඳහා ගෝලීය වෙළඳපොළ තුළ ඉහළ වටිනාකමක් ලබා ගැනීමටත් රජය අපේක්ෂා කරයි. මෙරට අපනයනකරුවන්ට නව වෙළඳ අවස්ථා විවර කර දීම සඳහා තානාපති කාර්යාලය නිරන්තරයෙන් සහාය ලබා දෙන බව මෙහිදී අවධාරණය කෙරිණි.
