කොටපොළ සෞඛ්ය වෛද්ය නිලධාරී කොට්ඨාශයේ දරුවන් අතර ඉතා සීග්රයෙන් පැතිර යන වෛරස් උණ තත්ත්වය පිළිබඳව සොයා බැලීමට සෞඛ්ය අමාත්යාංශයේ වසංගත රෝග විද්යා අංශයේ වෛද්යවරුන් අද (08) දෙණියාය මූලික රෝහලට පැමිණ තිබේ. අදාළ පරීක්ෂණ කටයුතු නිමවන තෙක් රෝගී තත්ත්වය පිළිබඳව නිශ්චිත ප්රකාශයක් කළ නොහැකි බව වෛද්යවරුන් අවධාරණය කර ඇත.
සෞඛ්ය ආරංචි මාර්ගවලට අනුව ඊයේ (07) වන විට රෝගීන් 47 දෙනෙකු වාර්තා වී තිබූ අතර ඉන් බහුතරයක් ප්රතිකාර ලබා සුවවී නිවෙස් බලා ගොස් තිබේ. පසුගිය දින කිහිපය තුළ රෝගය පැතිර යාමේ අඩුවක් දක්නට ලැබෙන බවත්, මෙම වෛරසය අපවිත්ර වූ ජලය හෝ ආහාර මගින් පැතිර යන්නට ඇති බවට වෛද්යවරුන් සැක පළ කරයි. මේ වන විට මෙම රෝගී තත්ත්වය දෙණියාය ප්රදේශයෙන් පමණක් වාර්තා වී ඇති බව ද සඳහන් වේ.
පවතින තත්ත්වය හමුවේ මහජනතාව දැනුවත් කිරීමට මාතර දිස්ත්රික් සෞඛ්ය සේවා අධ්යක්ෂක කාර්යාලය පියවර ගෙන ඇති අතර, උණු කර නිවාගත් පිරිසිදු ජලය සහ පිරිසිදු ආහාර ලබා ගැනීමේ වැදගත්කම පිළිබඳව දෙණියාය නගරය සහ අවට ප්රදේශවල ශබ්ද විකාශන යන්ත්ර මගින් දැනුවත් කිරීම් සිදු කර ඇත.
