වත්මන් රජය විවේචනය කරමින් සහ විපක්ෂයේ ඇතැම් පිරිස්වල හැසිරීම පිළිබඳව අදහස් දක්වමින් පාර්ලිමේන්තු මන්ත්රී චාමර සම්පත් දසනායක මහතා සුවිශේෂී ප්රකාශයක් සිදු කළේය. හිටපු කථානායක මහින්ද යාපා අබේවර්ධන මහතා ඇතුළු දේශපාලනඥයින් පිරිසකගේ සහභාගීත්වයෙන් පැවැති සම්මන්ත්රණයකදී ඔහු මේ බව කියා සිටියේය. තමන්ට එරෙහිව නඩු 8ක් පවතින බවත් රජය විසින් තමන්ව දේශපාලනිකව දඩයම් කිරීමට උත්සාහ කරන බවත් මන්ත්රීවරයා මෙහිදී පැවසූ අතර චාමරයත් ඕනේ නම් හිරේ ගියාදෙන් කියන තමන්ගේම අය ද සිටින බවත් ඔවුන් ආණ්ඩුව ගෙදර යවන වැඩේට උදවු කරන්නේ නැතිව කකුලෙන් අදින බවත් ඔහු වැඩිදුරටත් සඳහන් කළේය.
රටේ ආර්ථික තත්ත්වය පිළිබඳව ද අදහස් දැක්වූ මන්ත්රීවරයා රනිල් වික්රමසිංහ මහතා රට භාර දෙන විට රුපියල් 298ක්ව පැවති ඩොලරය අද වන විට රුපියල් 324 දක්වා ඉහළ ගොස් ඇති බව පෙන්වා දුන්නේය. ඩොලරය ඉහළ යාමත් සමඟ තෙල්, විදුලි සහ අනෙකුත් අත්යවශ්ය භාණ්ඩ මිල ඉහළ යාම වැළැක්විය නොහැකි බව කී මන්ත්රීවරයා පාර්ලිමේන්තුවට වැඩ කළ හැකි, ගමේ මිනිසුන් හඳුනන “වැඩකාරයින්” පත් කර ගත යුතු බවත් මල් පැළ දමන අතරතුර වැඩ කළ හැකි “වල් පැළත්” කිහිපයක් හෝ පාර්ලිමේන්තුවට එවීමට ජනතාව බුද්ධිමත් විය යුතු බවත් පැවසීය.
වත්මන් රජයට රට කරවීමට හැකියාවක් නොමැති බවත් ජනතාව ඡන්දයක් එනතෙක් මඟ බලා සිටින බවත් චාමර සම්පත් දසනායක මහතා මෙහිදී අවධාරණය කළේය.
