හිටපු ජනාධිපති රනිල් වික්රමසිංහ මහතා විසින් ඉතා අපහසුවෙන් ගොඩනඟන ලද ආර්ථික ස්ථාවරත්වය වත්මන් රජයේ අක්රමවත් ප්රතිපත්ති හේතුවෙන් නැවතත් කඩා වැටෙමින් පවතින බව එක්සත් ජාතික පක්ෂයේ ජාතික සංවිධායක සාගල රත්නායක මහතා පවසයි. මාතර නූපේ සණස ශාලාවේදී පැවැති ‘හොරුත් බොරුත් එක මිටට පරදවමු’ ජන හමුව අමතමින් ඔහු මේ බව කියා සිටියේය.
රටේ වත්මන් තත්ත්වය පිළිබඳව වැඩිදුරටත් අදහස් දැක්වූ සාගල රත්නායක මහතා පෙන්වා දුන්නේ රනිල් වික්රමසිංහ මහතාගේ පාලන සමයේදී පාලනය කර තිබූ උද්ධමනය මේ වන විට නැවතත් ඉහළ යමින් පවතින බවයි. රජය විසින් නිරන්තරයෙන් සිය ප්රතිපත්ති වෙනස් කිරීම හේතුවෙන් රටේ ආර්ථික වර්ධන වේගය ශීඝ්රයෙන් පහළ යමින් පවතින බවත් එමඟින් රටට මෙන්ම ජනතාවට ද දැඩි පීඩනයක් එල්ල වන බවත් ඔහු අවධාරණය කළේය.
රටේ අද වන විට ශක්තිමත් විපක්ෂයක අවශ්යතාවක් මතුව ඇති අතර ඒ වෙනුවෙන් විවිධ දේශපාලන මත දරන පක්ෂ රැසක් ඒකාබද්ධ විපක්ෂය ලෙස එක්වී කටයුතු කිරීමට තීරණය කළ බවද හෙතෙම පැවසීය. මෙම ඒකාබද්ධ වැඩපිළිවෙළ රට නැවත නිවැරදි මාවතට ගෙන එන තෙක් අඛණ්ඩව ක්රියාත්මක කරන බවත් ජනතාව මුහුණ දෙන දැවෙන ප්රශ්න වෙනුවෙන් සැමවිටම පෙනී සිටින බවත් සාගල රත්නායක මහතා වැඩිදුරටත් සඳහන් කළේය.
