මහනුවර දළදා වීදියේ පිහිටි පෞද්ගලික බැංකු ශාඛාවක ව්යාජ ණය අයදුම්පත් සහ ගිවිසුම් සකස් කිරීමේ සිද්ධියකට අදාළව එම බැංකුවේ සේවකයන් නවදෙනෙකු මහනුවර විශේෂ අපරාධ විමර්ශන අංශය මඟින් අත්අඩංගුවට ගෙන තිබේ.
පොලිසිය සඳහන් කරන පරිදි අත්අඩංගුවට ගත් පිරිස අතර පිරිමි නිලධාරීන් හයදෙනෙකු සහ කාන්තා නිලධාරිනියන් තිදෙනෙකු සිටින අතර ඔවුන් සියලු දෙනා ඊයේ (13) අත්අඩංගුවට ගෙන ඇත. 2012 සහ 2019 කාලසීමාවන් අතරතුර ව්යාජ ලේඛන ඉදිරිපත් කර බැංකු ණය ලබාගැනීමට ආධාර අනුබල දීම සම්බන්ධයෙන් මොවුන්ට චෝදනා එල්ල වී තිබේ. මේ පිළිබඳව මුලින්ම පැමිණිල්ලක් ලැබී ඇත්තේ 2022 අගෝස්තු මස 28 වැනිදාය.
අත්අඩංගුවට ගත් පිරිස අවුරුදු 32ත් 58ත් අතර වයස්වල පසුවන පුද්ගලයන් වන අතර ඔවුන් මහනුවර, පේරාදෙණිය, කටුගස්තොට, පුස්සැල්ලාව, හීරැස්සගල, කුරුණෑගල, පිළිමතලාව, හලෝලුව සහ ගුරුදෙණිය යන ප්රදේශවල පදිංචිකරුවෝ වෙති.
සැකකරුවන් මහනුවර මහේස්ත්රාත් අධිකරණය වෙත ඉදිරිපත් කිරීමෙන් අනතුරුව එක් අයෙකුට රුපියල් 500,000 බැගින් වූ ඇප මත මුදා හැරීමට නියෝග කර තිබේ. නඩුව නැවත කැඳවීම සැප්තැම්බර් 23 වැනිදාට නියමිත අතර විශේෂ අපරාධ විමර්ශන අංශය මඟින් වැඩිදුර පරීක්ෂණ පවත්වනු ලබයි.
