ලතින් පූජාවන් (Latin mass) වෙනුවෙන් කැපවී සිටින, වතිකානයෙන් වෙන්වී කටයුතු කරන කතෝලික කණ්ඩායමක් විසින් ලියෝ පාප් වහන්සේගේ අනුමැතියකින් තොරව නව රදගුරුවරුන් පත්කිරීමට ගෙන ඇති තීරණය වහාම අවලංගු කරන ලෙස වතිකානය දන්වා සිටියි. ස්විට්සර්ලන්තය පදනම් කරගත් “Society of St. Pius X” නම් මෙම අන්තගාමී සම්ප්රදායික කණ්ඩායම විසින් සිදුකිරීමට යන මෙම පියවර, පාප් වහන්සේ සමඟ පවතින සබඳතාවල බිඳවැටීමක් හෙවත් “භේදයක්” (schism) නිර්මාණය කරන බවට වතිකාන දහම පිළිබඳ කාර්යාලය අනතුරු අඟවයි. අනුමැතියකින් තොරව මෙලෙස රදගුරුවරුන් පත්කිරීම දෙවියන් වහන්සේට කරන දැඩි අපහාසයක් වන අතර, එමඟින් අදාළ පුද්ගලයන්ට සභාවෙන් නෙරපා හැරීමේ දඬුවම හෙවත් “සභා තහනම” (excommunication) පැනවීමට හේතු වන බව කාදිනල් වික්ටර් ෆර්නැන්ඩස් මහතා ප්රකාශ කර තිබේ.
මෙම තහනමට ලක්වන පුද්ගලයින්ට සභාවේ සක්රමේන්තු ලබාගැනීමට හෝ නිලතල දැරීමට නොහැකි වන අතර, පසුතැවිලි වී සමාව නොගතහොත් ඔවුන්ගේ මරණින් පසු කතෝලික භූමදානයක් පවා අහිමි වනු ඇත. වතිකානයේ ප්රධාන ඉගැන්වීම් ප්රතික්ෂේප කරමින් කටයුතු කරන මෙම කණ්ඩායම සහ වතිකානය අතර දශක ගණනාවක සිට නොසන්සුන්කාරී සබඳතාවක් පවතී. සභාවේ ඉගැන්වීම්වලට අනුව නව රදගුරුවරුන් පත්කිරීමේ පූර්ණ බලය පවතින්නේ පාප් වහන්සේට පමණක් වන අතර, මෙම නීතිය උල්ලංඝනය කරමින් ජූලි මාසයේදී නව පත්වීම් සිදුකිරීමට අදාළ කණ්ඩායම සැලසුම් කර තිබීම මෙම දැඩි අනතුරු ඇඟවීමට හේතු වී ඇත.
