දකුණු කොරියාවේ තාක්ෂණික දැවැන්තයෙකු වන සැම්සුන්ග් ඉලෙක්ට්රොනික්ස් (Samsung Electronics) සමාගම සහ එහි සේවක වෘත්තීය සමිතිය අතර පවතින වැටුප් අර්බුදය විසඳීම සඳහා රජයේ මැදිහත්කරුගේ සහභාගීත්වයෙන් එළඹෙන සඳුදා (18) දින නැවතත් සාකච්ඡා ආරම්භ කරන බව වෘත්තීය සමිතිය නිවේදනය කරයි. මෙමඟින් ලෝක මට්ටමින් සිදුවිය හැකිව තිබූ දරුණු වැඩවර්ජන තර්ජනයක් මඟහැරී යනු ඇතැයි ආර්ථික විශේෂඥයෝ අපේක්ෂා කරති.
මෙම තීරණාත්මක නිවේදනය නිකුත් වුණේ සැම්සුන්ග් සමාගමේ සභාපති ජේ වයි. ලී (Jay Y. Lee) මහතා විසින් මෙම කම්කරු ආරවුල සම්බන්ධයෙන් ලෝකවාසී පාරිභෝගිකයන්ගෙන් සහ පොදු මහජනතාවගෙන් ප්රසිද්ධියේ සමාව අයැදීමෙන් අනතුරුවය. “අප සමාගම තුළ ඇති වූ ගැටලු හේතුවෙන් ලොව පුරා සිටින පාරිභෝගිකයන්ට සිදු වූ අපහසුතාවයන් සහ කනස්සල්ල පිළිබඳව මම අවංකවම සමාව ඉල්ලා සිටිනවා” යැයි පවසමින් සභාපතිවරයා ප්රසිද්ධියේ හිස නමා ආචාර කරමින් සමාව ඉල්ලා සිටියේය.
මේ අතර, පවතින දැඩි අවදානම් තත්ත්වය සැලකිල්ලට ගනිමින් දකුණු කොරියානු අග්රාමාත්යවරයා, මුදල් අමාත්යවරයා සහ කම්කරු අමාත්යවරයා ද සැම්සුන්ග් කළමනාකාරීත්වය හමුවී සාකච්ඡා මාර්ගයෙන් කඩිනමින් ප්රශ්නය විසඳා ගන්නා ලෙස බලකර තිබේ. ලොව විශාලතම මෙමරි චිප් (Memory Chip) නිෂ්පාදකයා වන සැම්සුන්ග් ආයතනයේ වැඩවර්ජනයක් සිදු වුවහොත්, ඉන් ඔවුන්ගේ ප්රධාන ගනුදෙනුකරුවන් වන Nvidia, AMD සහ Google වැනි ලෝක සුපිරි සමාගම්වල නිෂ්පාදන අඩාල වනවා සේම, සමස්ත දකුණු කොරියානු ආර්ථිකයට, අපනයන ක්ෂේත්රයට සහ මූල්ය වෙළෙඳපොළට දැඩි බලපෑමක් එල්ල වීමේ අවදානමක් පවතී. සාකච්ඡා බිඳවැටුණහොත් ලබන සතියේ සිට වැඩවර්ජනයකට යන බව වෘත්තීය සමිතිය මීට පෙර ප්රකාශ කර තිබුණ ද, සමාගම විසින් සිය සාකච්ඡා නියෝජිතයා ද වෙනස් කරමින් වඩාත් සුභවාදීව මැදිහත් වීමට එකඟ වීම නිසා සඳුදා පැවැත්වෙන සාකච්ඡා දෙස ලෝක ආර්ථික අංශ දැඩි අවධානයෙන් පසුවෙයි.
