චීනයෙන් නිල වශයෙන් නිදහස ප්රකාශ කිරීමෙන් වළකින්නැයි ඇමරිකානු ජනාධිපති ඩොනල්ඩ් ට්රම්ප් සිදුකළ අනතුරු ඇඟවීමෙන් පසුව, තායිවානය තමන් දැනටමත් ස්වෛරී සහ ස්වාධීන රාජ්යයක් බව අවධාරණය කර තිබේ.
චීන ජනාධිපති ෂී ජින්පින් සමඟ බීජිං නුවරදී පැවැත්වූ දෙදින රාජ්ය තාන්ත්රික සමුළුවෙන් අනතුරුව මාධ්ය වෙත අදහස් දක්වමින් ජනාධිපති ට්රම්ප් ප්රකාශ කළේ, තායිවානය නිල වශයෙන් නිදහස ප්රකාශ කරනවාට තමන් අකමැති බවයි. “මම කාගේවත් ස්වාධීන වීමක් බලාපොරොත්තු වෙන්නේ නැහැ. යුද්ධයක් කරන්න අපිට හැතැප්ම 9,500ක් යන්න සිද්ධ වෙනවා. මට ඕන හැමෝම (චීනය සහ තායිවානය) සන්සුන් වෙන්නයි” යනුවෙන් ට්රම්ප් Fox News නාලිකාවට පවසා තිබුණි. එසේම, තායිවානයට ලබාදීමට නියමිත ඩොලර් බිලියන 11ක ආයුධ පැකේජය අනුමත කරන්නේද නැද්ද යන්න පිළිබඳව ඉදිරියේදී තීරණයක් ගන්නා බවත්, චීනය ආක්රමණය කළහොත් ඇමරිකාව තායිවානය ආරක්ෂා කරන්නේද යන්න ගැන ස්ථිර ප්රකාශයක් කිරීම ඔහු ප්රතික්ෂේප කළේය.
මෙම ප්රකාශයට ප්රතිචාර දක්වමින් තායිවාන ජනාධිපති කාර්යාලයේ ප්රකාශක කැරන් කුඕ (Karen Kuo) සෙනසුරාදා ප්රකාශ කළේ, තායිවානය “ස්වෛරී, ස්වාධීන සහ ප්රජාතන්ත්රවාදී රටක්” බව ලෝකයටම පැහැදිලි සත්යයක් බවයි. තායිවාන ජනාධිපති ලායි චිං-තේ (Lai Ching-te) ද මීට පෙර පෙන්වා දී ඇත්තේ තායිවානය දැනටමත් ස්වාධීන රටක් ලෙස ක්රියාත්මක වන බැවින් අලුතින් නිදහස ප්රකාශ කිරීමේ අවශ්යතාවයක් නොමැති බවයි. කෙසේ වෙතත්, තායිවානය චීනය සමඟ පවතින වත්මන් යථාර්ථවාදී තත්ත්වය (Status Quo) එනම්, නිල වශයෙන් නිදහස ප්රකාශ නොකිරීම සහ චීනය සමඟ එක්නොවී සිටීමේ ප්රතිපත්තිය තවදුරටත් ඉදිරියට ගෙනයාමට කැපවී සිටින බව ඇය වැඩිදුරටත් සඳහන් කළාය.
ඇමරිකානු නීතියට අනුව තායිවානයට ස්වයං ආරක්ෂාව සඳහා ආයුධ සැපයීමට වොෂින්ටනය බැඳී සිටියද, නිල වශයෙන් තායිවාන නිදහසට සහය නොදීමේ සහ “එකම චීනයක්” (One China Policy) පිළිගැනීමේ රාජ්ය තාන්ත්රික තුලනයක් පවත්වාගෙන යාමට ඇමරිකාවට සිදුව ඇත. කෙසේ වෙතත්, තායිවාන ප්රකාශකයා ට්රම්ප්ගේ ආරක්ෂක සහයෝගීතාවය අගය කරමින් කියා සිටියේ, තායිවාන සමුද්ර සන්ධියේ සාමය සහ ස්ථාවරත්වය රැකගැනීම වෙනුවෙන් ඇමරිකාව සමඟ ඇති සබඳතා තවදුරටත් ශක්තිමත් කරන බවයි.
