විපක්ෂ නායක සජිත් ප්රේමදාස මහතා සහ ශ්රී ලංකාවේ කැනඩා මහකොමසාරිස් ඉසබෙල් මාටින් (Isabel Martin) මහත්මිය අතර විශේෂ ද්විපාර්ශ්වීය හමුවක් අද (23) කොළඹ පිහිටි විපක්ෂ නායක කාර්යාලයේදී පවත්වා තිබේ. මෙම සාකච්ඡාවේදී ශ්රී ලංකාව මේ වන විට මුහුණ දෙන සාර්ව ආර්ථික අභියෝග මෙන්ම මෑතකදී බලපෑ “දිට්වා” සුළි කුණාටු ආපදාවෙන් පසු රට තුළ නිර්මාණය වී ඇති සමාජ ආර්ථික තත්ත්වයන් පිළිබඳව දීර්ඝ වශයෙන් අවධානය යොමු කෙරුණි. එහිදී විපක්ෂ නායකවරයා පෙන්වා දුන්නේ ආපදාවලින් පීඩාවට පත් සහ අවදානමට ලක්විය හැකි ප්රජාවන් වෙනුවෙන් ක්ෂණික සහන සැලසීම මෙන්ම ජීවනෝපාය ප්රතිසංස්කරණ කඩිනම් කළ යුතු බවයි. රටක් ලෙස නැවත නැඟී සිටීම සඳහා ජාත්යන්තර සහාය අත්යවශ්ය බව අවධාරණය කළ සජිත් ප්රේමදාස මහතා, ජාත්යන්තර මූල්ය අරමුදල (IMF) වෙත තමන් මෑතකදී ඉදිරිපත් කළ විශේෂ ඉල්ලීම් පිළිබඳව ද මහකොමසාරිස්වරිය දැනුවත් කිරීමට පියවර ගත්තේය.
මීට අමතරව, මෙරට වියළි කලාපයේ වෙසෙන කාන්තා ගොවීන් බලගැන්වීම, දේශගුණික සුහුරු කෘෂිකර්මාන්තය (Climate-smart agriculture) සහ තිරසාර ජල පෝෂක කළමනාකරණය ඉලක්ක කරගනිමින් කැනේඩියානු ඩොලර් මිලියන 5 ක ප්රතිපාදන මත ක්රියාත්මක වන “ඇක්සස් ශ්රී ලංකා” (ACCESS Sri Lanka) ව්යාපෘතිය වෙනුවෙන් විපක්ෂ නායකවරයා කැනඩා රජයට සිය කෘතඥතාව පළ කළේය. දෙරටේ ප්රජාතන්ත්රවාදී පාලනය, මානව හිමිකම් සහ ජනවාර්ගික සංහිඳියාව පිළිබඳව ද මෙහිදී අදහස් හුවමාරු වූ අතර, ප්රජාතන්ත්රවාදය සුරැකීම සඳහා කල් දැමූ පළාත් සභා මැතිවරණ කඩිනමින් පැවැත්වීමේ වැදගත්කම සජිත් ප්රේමදාස මහතා පෙන්වා දුන්නේය. එහිදී ආණ්ඩුක්රම ව්යවස්ථාවේ 13 වැනි සංශෝධනය සම්පූර්ණයෙන්ම ක්රියාත්මක කිරීම වෙනුවෙන් තමන් සතු ස්ථිර දේශපාලන කැපවීම ද විපක්ෂ නායකවරයා විසින් කැනඩා මහකොමසාරිස්වරිය ඉදිරියේ නැවත වරක් ස්ථිරව තහවුරු කරනු ලැබීය.
