කළු ගඟ ද්රෝණියේ ඉහළ ධාරා ප්රදේශවලට දැනට ලැබෙමින් පවතින අධික වර්ෂාපතනය හේතුවෙන් කළු ගඟ පිටාර තැන්නට අයත් පහත් බිම් ප්රදේශවලට සුළු ගංවතුර තත්ත්වයක් ඇතිවිය හැකි බවට වාරිමාර්ග දෙපාර්තමේන්තුව විසින් හදිසි අනතුරු ඇඟවීමේ නිවේදනයක් නිකුත් කර තිබේ. අද පෙරවරු 8:30 සිට ඉදිරි පැය 24ක කාලයක් බලපැවැත්වෙන පරිදි මෙම ගංවතුර අනතුරු ඇඟවීම නිකුත් කර ඇති බව එම දෙපාර්තමේන්තුව සඳහන් කරයි.
ඒ අනුව කළුතර දිස්ත්රික්කයට අයත් ඉංගිරිය, හොරණ, දොඩංගොඩ, මිල්ලනිය, කළුතර, බුලත්සිංහල, මදුරාවල සහ පාලින්දනුවර යන ප්රාදේශීය ලේකම් කොට්ඨාසවල කළු ගඟ අවට පිහිටි පහත් බිම්වල වෙසෙන ජනතාව මේ පිළිබඳව දැඩි අවධානයෙන් පසුවිය යුතුය.
ගඟේ ජල මට්ටම ක්රමයෙන් ඉහළ යමින් පවතින බැවින්, ඉහත සඳහන් කළ ප්රදේශවල පහත් බිම් හරහා දිවෙන අතුරු මාර්ග පරිහරණය කිරීමේදී රියදුරන් සහ ප්රදේශවාසීන් දැඩි ලෙස සැලකිලිමත් විය යුතු අතර, ආපදා කළමනාකරණ අංශ මඟින් ලබාදෙන ඉදිරි උපදෙස් කෙරෙහි නිරන්තර අවධානයෙන් පසුවන ලෙස ද වාරිමාර්ග දෙපාර්තමේන්තුව වැඩිදුරටත් ඉල්ලා සිටියි.
