වතු කර්මාන්තය තුළ සේවයේ නියුතු මලයාහ ජනතාව මුහුණ දෙන ආරක්ෂක ගැටලු සහ ඉඩම් ආරවුල් පිළිබඳව සොයා බලා කඩිනම් විසඳුම් ලබාදීමේ විශේෂ සාකච්ඡාවක් මහජන ආරක්ෂක හා පාර්ලිමේන්තු කටයුතු අමාත්ය ආනන්ද විජේපාල මහතාගේ ප්රධානත්වයෙන් පසුගියදා (2026-05-21) පාර්ලිමේන්තු පරිශ්රයේදී පැවැත්විණි. මෙම අවස්ථාවට මහජන ආරක්ෂක නියෝජ්ය අමාත්ය නීතිඥ සුනිල් වටගල, වැවිලි කර්මාන්ත නියෝජ්ය අමාත්ය සුන්දරලිංගම් ප්රදීප් සහ කම්කරු නියෝජ්ය අමාත්ය මහින්ද ජයසිංහ යන මහත්වරුන් ඇතුළු පක්ෂ විපක්ෂ මහජන නියෝජිතයින් රැසක් එක්ව සිටියහ. මීට අමතරව පොලිස්පති ප්රියන්ත වීරසූරිය මහතා, බස්නාහිර, දකුණ, සබරගමුව සහ මධ්යම යන පළාත් නියෝජනය කරමින් ජ්යෙෂ්ඨ පොලිස් නිලධාරීන්, වතු සමාගම් නියෝජිතයින්, වතු අධිකාරීවරුන් සහ රාජ්ය නොවන සංවිධානවල නියෝජිතයින් ඇතුළු විශාල පිරිසක් ද මෙම අවස්ථාවට සහභාගී වූහ.
වතු කම්කරු ජනතාව මුහුණ දෙන ආරක්ෂාව පිළිබඳ ගැටලු සහ පසුගිය සමයේ ඉඩම් ආරවුල් මුල් කරගනිමින් සිදුවූ පහරදීම් සම්බන්ධයෙන් පාර්ලිමේන්තුව තුළ මෙන්ම ඉන් පිටතදී ද විවිධ අදහස් පළවූ අතර, ඊට කඩිනමින් මැදිහත් වන බවට අමාත්යවරයා දුන් පොරොන්දුවට අනුව ශ්රී ලංකා පොලීසිය මැදිහත් වී අදාළ පහරදීම් සම්බන්ධයෙන් මේ වන විටත් නීතිමය පියවර ගෙන තිබේ. කෙසේ වෙතත්, මෙම ගැටුම්වලට මූලික හේතුව වී ඇති ඉඩම් ගැටලුවලට තිරසාර විසඳුමක් ලබාදීම සඳහා අදාළ සියලුම පාර්ශ්වයන් සමඟ සාකච්ඡා කර එකඟතාවකට පැමිණීම මෙම හමුවේ ප්රධාන අරමුණ විය.
මෙහිදී අමාත්ය ආනන්ද විජේපාල මහතා දැඩිව අවධාරණය කළේ කිසිදු පාර්ශ්වයකට නීතියෙන් පිටත කටයුතු කිරීමට ඉඩ නොතබන බවයි. වතු අධිකාරීවරුන්ට මෙන්ම වතු ක්ෂේත්රයේ සේවය කරන සාමාන්ය කම්කරු ජනතාවට ද නීතිය ඉදිරියේ සමාන අයිතිවාසිකම් ඇති බැවින් සියලු ගැටලු නීතිමය රාමුව තුළ හිඳිමින් විසඳාගත යුතු බව හෙතෙම කියා සිටියේය. එමෙන්ම, මෙවැනි පහරදීම් සහ ප්රචණ්ඩ ක්රියා වාර්තා වුවහොත් තරාතිරම නොබලා තදින්ම නීතිය ක්රියාත්මක කරන ලෙස අමාත්යවරයා මෙහිදී පොලීසියට උපදෙස් ලබා දුන්නේය.
