සිරියාව තුළ ක්රියාත්මක වූ ඉස්ලාමීය රාජ්ය (IS) සංවිධානයට සම්බන්ධ යැයි සැක කෙරෙන ප්රබල ත්රස්තවාදීන් 10 දෙනෙකු තුර්කි ජාතික බුද්ධි ඒජන්සිය (MIT) විසින් විශේෂ මෙහෙයුමකින් අත්අඩංගුවට ගෙන නැවත තුර්කිය වෙත රැගෙන විත් ඇති බව එරට ඇනඩොලු (Anadolu) පුවත් සේවය සෙනසුරාදා (අද) වාර්තා කළේය. සිරියානු බුද්ධි අංශවල ද සම්බන්ධීකරණය ඇතිව සිදුකරන ලද මෙම රහසිගත මෙහෙයුමේදී අත්අඩංගුවට පත් වූ සියලුම සැකකරුවන් තුර්කි සම්භවයක් සහිත පුද්ගලයන් වන අතර ඔවුන් අතීතයේ තුර්කිය තුළ සිදුවූ දරුණු ත්රස්ත ප්රහාර රැසකට සෘජුවම සම්බන්ධ වී ඇති බව ආරක්ෂක අංශ පවසයි.
ආරක්ෂක අංශ වාර්තාවලට අනුව, අත්අඩංගුවට ගත් එක් සැකකරුවෙකු 150කට අධික පිරිසකට මරු කැඳවමින් 2015 වසරේදී අන්කාරා (Ankara) දුම්රිය ස්ථානයේ සිදුකළ මරාගෙන මැරෙන බෝම්බ ප්රහාරයේ මහමොළකරුවන් සමඟ සමීප සබඳතා පවත්වා ඇති අතර, අනෙක් සැකකරු තුර්කිය ඉලක්ක කරගනිමින් ක්රියාත්මක වූ ඉස්ලාමීය රාජ්ය සංවිධානයේ බුද්ධි අංශ ප්රධානියා ලෙස කටයුතු කර තිබේ. මෙම සැකකරුවන් පිරිස සිරියාව සහ තුර්කිය කේන්ද්ර කරගනිමින් සන්නද්ධ පුහුණුවීම් ලබාදීම, ත්රස්ත ප්රචාරක කටයුතු මෙහෙයවීම මෙන්ම ඉදිරි ප්රහාර සැලසුම් කිරීම සහ ඒවාට අනුබල දීම යන බරපතළ චෝදනා යටතේ ඉදිරි විමර්ශන සඳහා තුර්කි ආරක්ෂක අංශ වෙත භාර දී ඇත.
