ශ්රී ලංකා වාණිජ මණ්ඩල සම්මේලනයේ (FCCISL) 49 වන වාර්ෂික මහා සභා රැස්වීමේදී, ප්රවීණ ව්යවසායකයෙකු සහ ‘අයිඩැක්’ (idac) සමාගමේ සභාපති ආචාර්ය රෝහිත සිල්වා මහතා 2026 සිට 2028 දක්වා කාලසීමාව සඳහා එහි නව සභාපතිවරයා ලෙස පත් කර තිබේ.
1973 වසරේදී දිවයින පුරා ප්රාදේශීය වාණිජ මණ්ඩල ජාලයක් ගොඩනැගීමේ අරමුණින් ආරම්භ වූ FCCISL, වසර 53ක අභිමානවත් ඉතිහාසයක් සතු ආයතනයකි. 1990 දශකයේ මැද භාගයේදී සිදු වූ ආයතනික පරිවර්තනයත් සමඟ, ප්රතිපත්තිමය උපදේශනය, ව්යාපාරික පුහුණුව සහ ජාත්යන්තර වෙළෙඳ පහසුකම් සැලසීම කෙරෙහි මෙම සම්මේලනය විශේෂ අවධානයක් යොමු කළේය. විශේෂයෙන් 2004 සුනාමි ව්යසනයෙන් පසු ඔවුන් දියත් කළ “Back to Business” ව්යාපෘතිය 2008 වසරේදී ලෝක වාණිජ මණ්ඩල සම්මේලන සම්මානයෙන් පිදුම් ලැබීම කැපී පෙනේ.
වර්තමානයේදී දිවයින පුරා විහිදුණු වාණිජ මණ්ඩල සහ ව්යාපාරික සංගම් 63කට වැඩි ජාලයක් නියෝජනය කරන FCCISL, ව්යාපාරික ආයතන 100,000කට අධික සංඛ්යාවක හඬ ලෙස කටයුතු කරයි. නව ව්යවසායකයින් දිරිගැන්වීම, කාන්තා ව්යවසායකත්වය සවිබල ගැන්වීම සහ ‘ශ්රී ලංකා ව්යවසායකත්ව වසරේ සම්මාන’ (SLEOTY) වැනි උත්සව පැවැත්වීම මගින් රටේ ආර්ථිකයට දැවැන්ත දායකත්වයක් ලබා දේ. මීට අමතරව, සාර්ක් (SAARC CCI), ආසියා පැසිෆික් කලාපීය වාණිජ මණ්ඩල සම්මේලනය (CACCI) සහ චීන ජාත්යන්තර වෙළෙඳ ප්රවර්ධන සභාව (CCPIT) වැනි ජාත්යන්තර ආයතන සමඟ එක්ව ශ්රී ලංකාවේ ජාත්යන්තර වෙළෙඳාම ප්රවර්ධනය කිරීමට ද ඔවුන් කටයුතු කරයි.
