‘දිට්වා’ සුළි කුණාටුවෙන් පූර්ණ හානියට පත් නිවසක් සඳහා රජයෙන් ලැබීමට නියමිත රුපියල් ලක්ෂ 50ක වන්දි මුදලේ පළමු වාරිකය නිදහස් කිරීම වෙනුවෙන් රුපියල් ලක්ෂයක අල්ලස් මුදලක් ලබාගත් මොණරාගල ප්රාදේශීය ලේකම් කාර්යාලයේ ආපදා සහන නිලධාරි වි.ආර්. සුමිත් වීරසිංහ මහතාව ලබන ජූනි 09 වැනිදා දක්වා යළි රක්ෂිත බන්ධනාගාරගත කිරීමට කොළඹ ප්රධාන මහේස්ත්රාත් අසංග එස්. බෝදරගම මහතා අද (25) නියෝග කළේය.
අල්ලස් කොමිසම අධිකරණය හමුවේ කරුණු දක්වමින් සඳහන් කළේ, පැමිණිලිකාරියගේ නිවසට සිදුවූ හානිය වෙනුවෙන් රජය අනුමත කළ රුපියල් ලක්ෂ 50ක වන්දි මුදලේ පළමු වාරිකය වන ලක්ෂ 20ක මුදල ඇයගේ බැංකු ගිණුමට යොමු කිරීමෙන් පසු, එම ගිණුමෙන් රුපියල් ලක්ෂ හයක් ලබාගන්නා අවස්ථාවේදී මෙම සැකකරු ඇයගෙන් රුපියල් ලක්ෂයක මුදලක් ‘කොමිස්’ ලෙස ඉල්ලා ලබාගෙන ඇති බවයි.
එමෙන්ම, ඉදිරියට ලබාදීමට නියමිත වන්දි මුදලේ දෙවන සහ තෙවන වාරික නිදහස් කිරීමේදී ද රුපියල් ලක්ෂ පහ බැගින් වූ අල්ලස් මුදලක් මෙම නිලධාරියා ඇයගෙන් ඉල්ලා ඇති බවද අල්ලස් කොමිසම වැඩිදුරටත් අනාවරණය කළේය.
ඉදිරිපත් වූ කරුණු සලකා බැලූ මහේස්ත්රාත්වරයා, මෙම සිද්ධියට අදාළ විමර්ශන කඩිනම් කරන ලෙසත්, සැකකරු එම කාර්යාලයේ නිල වශයෙන් ඉටු කළ යුතු රාජකාරි මොනවාද යන්න පිළිබඳව පුළුල් විමර්ශනයක් පවත්වා අධිකරණයට වාර්තා කරන ලෙසත් අල්ලස් කොමිසමට නියෝග කළේය.
