අමෙරිකානු ජනාධිපති ඩොනල්ඩ් ට්රම්ප් විසින් අභ්යන්තර ආදායම් සේවයට (IRS) එරෙහිව ගොනු කර තිබූ අමෙරිකානු ඩොලර් බිලියන 10ක නඩුව අවසන් කිරීම සඳහා රජය සමඟ එළඹුණු එකඟතාව පිළිබඳව විශේෂ අධිකරණ සමාලෝචනයක් ආරම්භ කිරීමට ෆ්ලොරිඩා ප්රාන්තයේ දිස්ත්රික් විනිසුරු කැත්ලීන් විලියම්ස් පියවර ගෙන තිබේ. තම පෞද්ගලික බදු වාර්තා මාධ්ය වෙත කාන්දු කිරීම සම්බන්ධයෙන් රජයට එරෙහිව ට්රම්ප් මෙම නඩුව පවරා තිබූ අතර, එහි එකඟතාවක් ලෙස අමෙරිකානු ඩොලර් බිලියන 1.8ක “ආයුධකරණයට එරෙහි” අරමුදලක් පිහිටුවීමට යෝජනා වී ඇත.
මෙම එකඟතාව “අධිකරණය රවටා සිදුකළ කුමන්ත්රණයක්” බව පවසමින් විශ්රාමික ෆෙඩරල් විනිසුරුවරුන් 35 දෙනෙකු විසින් ඉදිරිපත් කළ පෙත්සමකට ප්රතිචාර දක්වමින් විනිසුරු විලියම්ස් මෙම නියෝගය නිකුත් කර ඇත. මෙම නඩුව මීට පෙර මැයි 18 වන දින විනිසුරුවරිය විසින් නිෂ්ප්රභ කර තිබුණද, බරපතල අක්රමිකතා විමර්ශනය කිරීමට අධිකරණයට බලය ඇති බැවින් මෙම නඩුව යළි විවෘත කිරීමට සහ පරීක්ෂා කිරීමට ඇය තීරණය කර ඇත.
මේ අතර, වර්ජිනියා ප්රාන්තයේ දිස්ත්රික් විනිසුරු ලියොනි බ්රින්කෙමා විසින් ජුනි 12 වන දින දක්වා මෙම “ආයුධකරණයට එරෙහි අරමුදල” (Anti-Weaponization Fund) ක්රියාත්මක කිරීම තාවකාලිකව අත්හිටුවමින් නියෝගයක් නිකුත් කර තිබේ. 2021 ජනවාරි 6 වැනිදා කැපිටල් ගොඩනැගිල්ලට පහර දුන් පුද්ගලයින්ට ද මෙම අරමුදලින් වන්දි ලබා දිය හැකි බවට මත පළ වීමත් සමඟ රිපබ්ලිකන් පක්ෂයේ ඇතැම් මන්ත්රීවරුන්ගෙන් පවා මෙම අරමුදලට දැඩි විරෝධයක් එල්ල විය.
මෙම එකඟතාව හරහා ට්රම්ප්, ඔහුගේ පවුලේ සාමාජිකයන් සහ සමාගම්වල අතීත බදු වාර්තා සම්බන්ධයෙන් පරීක්ෂණ පැවැත්වීම වැළැක්වීමට ද උත්සාහ කර ඇති බව නීති විශේෂඥයින් පෙන්වා දෙයි. සාමාන්යයෙන් මෙවැනි දැවැන්ත අරමුදල් කොංග්රස් මණ්ඩලයේ නීතියකින් හෝ අධිකරණ අධීක්ෂණය යටතේ ස්ථාපිත කළ යුතු බවත්, මෙම එකඟතාව අතිශය අසාමාන්ය සහ සැක සහිත බවත් නීති ක්ෂේත්රයේ විචාරකයින්ගේ මතයයි.
