දූෂණය වැළැක්වීම සඳහා විධිමත් යාන්ත්රණයක් සකස් කිරීමට වර්තමාන රජය අසමත් වී ඇති බවත්, පවතින රාජ්ය ගනුදෙනුවල විනිවිදභාවයේ බරපතල අඩුවක් පවතින බවත් කොළඹ අගරදගුරු අතිඋතුම් මැල්කම් කාදිනල් රංජිත් හිමිපාණෝ පවසති. වෙසක් උත්සවය නිමිත්තෙන් කොළඹ අගරදගුරු මැදුරේ සංවිධානය කර තිබූ දන්සලක් විවෘත කිරීමේ අවස්ථාවට එක්වෙමින් උන්වහන්සේ මේ බව ප්රකාශ කළහ.
මෙහිදී රජයේ ක්රියාකලාපය දැඩි ලෙස විවේචනයට ලක් කළ කාදිනල් හිමිපාණන්, දූෂණය වැළැක්වීමේ නිසි ක්රමවේදයක පවතින අඩුව හේතුවෙන් රටේ ආර්ථිකයට දැඩි බලපෑම් එල්ල වී ඇති බව පෙන්වා දුන්හ. එමෙන්ම, ජාත්යන්තර මූල්ය අරමුදල (IMF) යනු ජනතාවගේ පැත්තෙන් තීරණ ගන්නා ආයතනයක් නොව ලාභය අරමුණු කරගත් බැංකුවක් බවත්, එහි කොන්දේසි මතම පමණක් රට ඉදිරියට ගෙන යාමට උත්සාහ කළහොත් රටේ ආර්ථිකය ගොඩනැගීමට නොහැකි වනු ඇති බවටත් උන්වහන්සේ අනතුරු ඇඟවූහ.
ලෝක දේශපාලන තත්ත්වයන් සහ තෙල් මිල ඉහළ යාම හේතුවෙන් ජනතාව දැඩි පීඩාවකට පත්ව සිටින බැවින්, රජය කළ යුත්තේ කෙසේ හෝ උත්සාහ කර ජනතාවගේ ජීවන බර අවම කිරීම බව උන්වහන්සේ පැවසූහ. පවතින සම්ප්රදායික ක්රමවේද වෙනස් නොකරන්නේ නම් මෙම ආර්ථික අර්බුදයෙන් රට ගලවා ගත නොහැකි බවත්, රට පාලනය කරන නායකයින් මීට වඩා විප්ලවීය සහ නවීන ආකාරයකින් සිතීමට පුරුදු විය යුතු බවත් කාදිනල් හිමිපාණන් වැඩිදුරටත් අවධාරණය කළහ.
