ශ්රී ලංකාව සහ සීෂෙල්ස් අතර සංචාරක සබඳතා තවදුරටත් ශක්තිමත් කර ගැනීමේ අරමුණින් දෙරටේ අවධානය යොමුව තිබේ. ඒ අනුව, සීෂෙල්ස්හි ශ්රී ලංකා මහ කොමසාරිස් කාර්යාලය විසින් සංවිධානය කරන ලද විශේෂ අධ්යයන චාරිකාවක් (familiarization trip) සාර්ථකව නිම කර ඇත.
මෙම සංචාරය සඳහා සීෂෙල්ස්හි සංචාරක නියෝජිතයන් සහ එයාර් සීෂෙල්ස් (Air Seychelles) ආයතනයේ නියෝජිත පිරිසක් සහභාගි වූහ. ශ්රී ලංකාව තුළ පවතින වෛද්ය සංචාරක (medical tourism) සහ සාප්පු සවාරි සංචාරක (shopping tourism) ක්ෂේත්රවල ඇති දියුණුව සහ විභවතාවන් පිළිබඳව ඔවුන්ට සෘජු අවබෝධයක් ලබා දීම මෙහි ප්රධාන අරමුණ විය.
සහභාගිවන්නන්ට ශ්රී ලංකාවේ ප්රමුඛ පෙළේ සෞඛ්ය පහසුකම් සහ සුවතා සේවා පිළිබඳව අත්දැකීම් ලබා දුන් අතර, එමගින් සීෂෙල්ස් වැසියන් වෙනුවෙන්ම වෙන්වූ විශේෂ සංචාරක පැකේජ සකස් කිරීම අපේක්ෂා කෙරේ. මෙම වැඩසටහන සාර්ථක කර ගැනීම සඳහා එයාර් සීෂෙල්ස්, ඇන්ඩෘ ට්රැවල් (Andrew Travel) පුද්ගලික සමාගම සහ ශ්රී ලංකා සංචාරක ප්රවර්ධන කාර්යාංශය ලබා දුන් සහයෝගය මහ කොමසාරිස් කාර්යාලයේ ඇගයීමට ලක්ව ඇත.
