මාධ්ය වෙත තොරතුරු ලබා දෙන පුද්ගලයින් හඳුනාගෙන ඔවුන් පාර්ලිමේන්තු වරප්රසාද කමිටුව හමුවට කැඳවීමට රජයේ මන්ත්රී ලක්මාලි හේමචන්ද්ර මහත්මිය දරන උත්සාහයක් සම්බන්ධයෙන් නිදහස් මාධ්ය ව්යාපාරය (FMM) සිය දැඩි විරෝධය සහ හෙළා දැකීම ප්රකාශ කර තිබේ.
පාර්ලිමේන්තු කාන්තා මන්ත්රීවරියන්ගේ සංසදයේ පැවති රැස්වීමකදී ජාතික ළමා ආරක්ෂක අධිකාරියට අදාළ ගැටලු සහ ළමා අපචාර සැකකරුවෙකු සම්බන්ධයෙන් සාකච්ඡා කර තිබේ. එම රැස්වීමේ තොරතුරු මාධ්ය වෙත ලබා දුන් පුද්ගලයින්ට එරෙහිව පියවර ගන්නා ලෙසත්, එම තොරතුරු හෙළි කළ මූලාශ්ර හඳුනා ගැනීමටත් ලක්මාලි හේමචන්ද්ර මන්ත්රීවරිය යෝජනා කර ඇති බවට බී.බී.සී. සිංහල වාර්තාවක් හරහා අනාවරණය විය.
මෙම ක්රියාකලාපය ප්රජාතන්ත්රවාදී මූලධර්ම සහ මාධ්ය නිදහස බරපතළ ලෙස උල්ලංඝනය කිරීමක් බව FMM පෙන්වා දෙයි. මාධ්යවේදීන්ට පීඩනය යෙදීම සහ රහසිගත තොරතුරු මූලාශ්ර හෙළි කිරීමට උත්සාහ කිරීම කිසිසේත්ම පිළිගත නොහැකි බව ඔවුන් අවධාරණය කරයි. එම රැස්වීමේදී තොරතුරු බෙදා හරින පුද්ගලයින්ට එරෙහිව අන්තර්ජාලය සහ සමාජ මාධ්ය ආශ්රිත නීති භාවිතා කිරීම පිළිබඳව සිදු වූ සාකච්ඡා සම්බන්ධයෙන් ද සංවිධානය සිය කනස්සල්ල පළ කරයි.
ප්රජාතන්ත්රවාදී සමාජයක මාධ්යවේදීන්ගේ සහ ඔවුන්ගේ තොරතුරු මූලාශ්රවල ආරක්ෂාව මූලික අවශ්යතාවක් බව පවසන නිදහස් මාධ්ය ව්යාපාරය, වගකීම් සහගත සහ විනිවිදභාවයකින් යුතු ප්රජාතන්ත්රවාදී පරිසරයක් පවත්වා ගැනීමට රජයේ නියෝජිතයින් කටයුතු කළ යුතු බව වැඩිදුරටත් අවධාරණය කරයි.
