මහා බ්රිතාන්යයේ වැඩිම පැරාලිම්පික් පදක්කම් ලාභිනිය වන ඩේම් සාරා ස්ටෝරි (Dame Sarah Storey), වහාම ක්රියාත්මක වන පරිදි ජාත්යන්තර ක්රීඩාවෙන් විශ්රාම ගැනීමට තීරණය කර තිබේ. 48 හැවිරිදි වියේ පසුවන මෙම විශිෂ්ට පාපැදි ක්රීඩිකාව, 2028 ලොස් ඇන්ජලීස් පැරාලිම්පික් උළෙලට සහභාගි නොවන අතර, සිය ඉදිරි කාලය පැරා ක්රීඩාවන් දියුණු කිරීම සඳහා කැප කිරීමට බලාපොරොත්තු වේ.
තම විශ්රාම ගැන්වීම පිළිබඳව අදහස් දක්වමින් ඇය සඳහන් කළේ, 2012 ලන්ඩන් ඔලිම්පික් උළෙලින් පසුව පැරා ක්රීඩාවන් යම් පසුබෑමකට ලක්ව ඇති බවත්, තවදුරටත් අවධානය යොමු කළ යුතු ක්ෂේත්ර රැසක් පැරා ක්රීඩාව තුළ පවතින බවත්ය. පාපැදි තරගවලට සහභාගි වෙමින් තවත් පදක්කම් දිනා ගැනීමට වඩා, ක්රීඩාවෙන් පිටත සිට පැරා ක්රීඩාවන්ගේ උන්නතිය වෙනුවෙන් විශාල බලපෑමක් කිරීමට තමන්ට හැකි වනු ඇතැයි ඇය විශ්වාසය පළ කළාය.
සාරා ස්ටෝරි සිය ක්රීඩා දිවිය ආරම්භ කළේ පිහිනුම් ක්රීඩිකාවක ලෙස වන අතර, 1992 වසරේදී 14 හැවිරිදි වියේදී සිය පළමු පැරාලිම්පික් තරගයට සහභාගි විය. පැරාලිම්පික් තරගාවලි නවයකදී රන් පදක්කම් ඇතුළු සමස්ත පදක්කම් 30ක් දිනා ගැනීමට ඇය සමත්වූ අතර, එය ඇයව පැරාලිම්පික් ඉතිහාසයේ වඩාත්ම සාර්ථක ක්රීඩිකාව බවට පත් කළේය. 2005 වසරේදී ඇතිවූ ආසාදන තත්ත්වයක් හේතුවෙන් පිහිනුම් තරගවලින් ඉවත් වූ ඇය, පසුව පාපැදි ක්රීඩාවට යොමු වූ අතර, 2008 බීජිං ඔලිම්පික් උළෙලේ සිට ඇය සිය පාපැදි රන් පදක්කම් 14 දිනා ගත්තාය. 2010 පොදුරාජ්ය මණ්ඩලීය ක්රීඩා උළෙලේදී ශාරීරික ආබාධ නොමැති ක්රීඩක ක්රීඩිකාවන් සමඟ තරග කළ දෙවන පැරා ක්රීඩිකාව ලෙස ඇය ඉතිහාසයට එක්විය. දරු දෙදෙනෙකුගේ මවක් ලෙසද ඇය සිය ක්රීඩා දිවිය සාර්ථකව පවත්වා ගත් අතර, 2013 සහ 2017 වසරවලදී ඇය සිය දරුවන් ලැබීමෙන් පසු පැරාලිම්පික් ශූරතා රැසක් දිනා ගත්තාය.
ලන්ඩන් ඔලිම්පික් සංවිධායක කමිටුවේ හිටපු සභාපති සහ වර්තමාන ලෝක මලල ක්රීඩා සම්මේලනයේ සභාපති ලෝඩ් කෝ පවසන්නේ, සාරා ස්ටෝරි මතු කරන කරුණු ඉතා වැදගත් බවත්, පැරා ක්රීඩාවන්ගේ අනාගතය සුරක්ෂිත කිරීම සඳහා ඉදිරියට පියවර තැබිය යුතු බවත්ය. සිය වසර 35ක ජාත්යන්තර ක්රීඩා දිවිය තුළ පැරා ක්රීඩාවන් ලැබූ ප්රගතිය දැකීම තමන්ට විශාල ආඩම්බරයක් බව ස්ටෝරි අවසාන වශයෙන් ප්රකාශ කළාය.
