මෙරට පාසල් පද්ධතිය ඩිජිටල්කරණය කිරීම සහ අනාගතයට සූදානම් තාක්ෂණික කුසලතාවලින් සිසුන් බලගැන්වීමේ ජාතික කර්තව්‍යය තවදුරටත් ඉදිරියට ගෙන යමින්, කොමර්ෂල් බැංකුව විසින් ස්ථාපිත කරන ලද 200 වන STEM (විද්‍යා, තාක්ෂණ, ඉංජිනේරු සහ ගණිත) පන්ති කාමරය පානදුර අගමේති බාලිකා මහා විද්‍යාලයේදී නිල වශයෙන් විවෘත කර තිබේ. ඌන භාවිත පැවති අවකාශයක් උසස් SMART පුවරු, ඩිජිටල් උපාංග සහ තාක්ෂණික මෙවලම්වලින් පරිපූර්ණ අන්තර්ක්‍රියාකාරී ඉගෙනුම් මධ්‍යස්ථානයක් බවට පරිවර්තනය කරමින් දියත් කළ මෙම ව්‍යාපෘතිය, මෙරට ප්‍රාථමික හා ද්විතියික අධ්‍යාපන ක්ෂේත්‍රයේ ඩිජිටල් පරතරය පියවීම උදෙසා පෞද්ගලික අංශය දක්වන සක්‍රීය දායකත්වයේ තීරණාත්මක සන්ධිස්ථානයක් ලෙස සැලකේ.
මෙම අතිනූතන පහසුකම මඟින් පානදුර අගමේති බාලිකා මහා විද්‍යාලයේ සිසුන් 2,500 කට අධික සංඛ්‍යාවකට සහ ගුරු මණ්ඩලයට නවීන තොරතුරු තාක්ෂණය, කේතකරණය (coding) සහ අන්තර්ක්‍රියාකාරී ඩිජිටල් පාඩම් මාලා භාවිත කිරීමේ අවස්ථාව උදාවන අතර, කොමර්ෂල් බැංකුවේ දීර්ඝකාලීන STEM වැඩසටහන හරහා සමස්තයක් ලෙස රට පුරා සිසුන් 325,000 කට වැඩි පිරිසකට මෙම තාක්ෂණික ඉගෙනුම් වරප්‍රසාද හිමිව ඇත. මීට පෙර තොරතුරු තාක්ෂණ විද්‍යාගාර 400 කට අධික සංඛ්‍යාවක් පාසල් පද්ධතියට දායක කරමින් සිසුන් අර්ධ මිලියනයකට අධික සංඛ්‍යාවක් සව බලගන්වා ඇති මෙම වැඩසටහන, දේශීය ශ්‍රම බලකාය ගෝලීය ඩිජිටල් ආර්ථිකයට ගැළපෙන පරිදි සූදානම් කිරීමේ පුළුල් පදනමක් නිර්මාණය කර තිබේ.
අනාගත ලෝකයේ මතුවන සංකීර්ණ තාක්ෂණික අභියෝගයන්ට මුහුණ දිය හැකි බුද්ධිමත් හා කුසලතාපූර්ණ පරපුරක් බිහිකිරීම උදෙසා අධ්‍යාපන පද්ධතිය තුළ මෙවැනි පෞද්ගලික ආයතනික සමාජ වගකීම් (CSR) ව්‍යාපෘති සක්‍රීයව පවත්වාගැනීම අතිශය වැදගත් වේ. ඉදිරියේදීත් රාජ්‍ය අධ්‍යාපන ප්‍රතිපත්ති සමඟ බද්ධ වෙමින් දිවයින පුරා පවතින පාසල් වෙත ඩිජිටල් යටිතල පහසුකම් ව්‍යාප්ත කිරීමට කොමර්ෂල් බැංකුව කටයුතු කරනු ඇති අතර, එමඟින් නාගරික හා ග්‍රාමීය පාසල් අතර පවතින තාක්ෂණික පරතරය අවම වී ශ්‍රී ලාංකේය අධ්‍යාපන ක්ෂේත්‍රය නව මානයකට යොමු වනු ඇතැයි අධ්‍යාපනඥයෝ සහ ආර්ථික විද්‍යාඥයෝ පෙන්වා දෙති.
