සෞදි අරාබියට ආරක්ෂක සහාය ලබාදීම සඳහා අවශ්‍ය අවසර ලබාගැනීමට ඊජිප්තු ජනාධිපති අබ්දෙල් ෆත්තා අල්-සිසි හදිසි පාර්ලිමේන්තු සැසියක් කැඳවන ලෙස ඉල්ලා තිබේ.
2026 ඔක්තෝබර් 17 වැනිදා ඊජිප්තු හමුදා ඇකඩමියේ උපාධි ප්‍රදානෝත්සවයකදී අදහස් දක්වමින් ජනාධිපතිවරයා ප්‍රකාශ කර ඇත්තේ, සෞදි අරාබියෙන් නිල ඉල්ලීමක් ලැබුණහොත් එරට ආරක්ෂාව වෙනුවෙන් අවශ්‍ය පියවර ගැනීමට ඊජිප්තුව සූදානම් බවයි.
කෙසේ වෙතත්, මෙය වෙනත් රටකට ප්‍රහාර එල්ල කිරීමේ අරමුණින් ගන්නා පියවරක් නොවන බවත්, සෞදි අරාබියේ ආරක්ෂාව වෙනුවෙන් පමණක් ක්‍රියාත්මක වන බවත් ඔහු අවධාරණය කර තිබේ. එවැනි ක්‍රියාමාර්ග සඳහා ඊජිප්තු පාර්ලිමේන්තුවේ අනුමැතිය අවශ්‍ය බවද ජනාධිපතිවරයා සඳහන් කර ඇත.
මෙම ප්‍රකාශය සිදුකර ඇත්තේ යේමනයේ ඉරානයේ සහාය ලබන හූති සටන්කාමීන් සෞදි අරාබියේ ගුවන් තොටුපළ ඇතුළු වැදගත් යටිතල පහසුකම් ඉලක්ක කර ප්‍රහාර එල්ල කර ඇති බවට වාර්තා පළවන පසුබිමකය.
සෞදි අරාබියට සහාය ලබාදීම සම්බන්ධයෙන් ඊජිප්තුව ගන්නා ඉදිරි පියවර, සෞදි පාර්ශ්වයෙන් ලැබෙන ඉල්ලීම සහ ඊජිප්තු පාර්ලිමේන්තුවේ අනුමැතිය මත තීරණය වනු ඇත.
