ඖෂධ ආනයනය මත පවතින දැඩි විදේශීය යැපීම අවම කරමින් දේශීය ඖෂධ නිෂ්පාදනය පුළුල් කිරීමේ ජාතික අභිලාෂය පෙරදැරිව, මෙරට ප්‍රථම ඉන්සියුලින් නිෂ්පාදන කර්මාන්තශාලාව කොග්ගල අපනයන සැකසුම් කලාපයේදී ස්ථාපනය කිරීමට රජය පියවර ගෙන තිබේ. රුපියල් බිලියන 3කට අධික ආයෝජනයකින් ඉදිකිරීම් අවසන් කර ඇති මෙම පහසුකම, සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතාගේ නිරීක්ෂණයට ලක්වූ අතර, සෞඛ්‍ය ක්ෂේත්‍රයේ පවතින සැපයුම් බිඳවැටීම් සහ විදේශ විනිමය අර්බුදයන්ට තිරසාර විසඳුමක් ලබාදීමේ තීරණාත්මක ආරම්භයක් ලෙස මෙය ඇගයීමට ලක්වේ.
ශ්‍රී ලංකා රාජ්‍ය ඖෂධ නිෂ්පාදන සංස්ථාව සමඟ වසර 15ක සැපයුම් ගිවිසුමක් සහිත ඒකාබද්ධ ව්‍යාපාරයක් ලෙස ක්‍රියාත්මක වන මෙම කර්මාන්තශාලාව, අවශ්‍ය වලංගුකරණ ක්‍රියාවලියෙන් අනතුරුව 2027 වසරේදී සිය නිෂ්පාදන කටයුතු නිල වශයෙන් ආරම්භ කිරීමට නියමිතය. දැනට මෙරට රෝහල් පද්ධතියට අවශ්‍ය ඖෂධවලින් සියයට 85කට වැඩි ප්‍රමාණයක් ආනයනය කිරීමට සිදුවීම හේතුවෙන් හටගන්නා අර්බුද හමුවේ, මෙම ආයතනය මඟින් ඉන්සියුලින්වලට අමතරව නිර්වින්දන හා වේදනා නාශක ඇතුළු ඖෂධ වර්ග 33ක් දක්වා නිෂ්පාදනය පුළුල් කිරීමට සැලසුම් කර ඇත. එමඟින් රෝහල් පද්ධතියට අඛණ්ඩව ඖෂධ සැපයීම තහවුරු වන අතරම, විදේශීය සැපයුම්කරුවන් මත තැබූ පූර්ණ පදනම ද සැලකිය යුතු ලෙස ලිහිල් වනු ඇත.
දේශීය අවශ්‍යතා සපුරාලීමෙන් අනතුරුව ප්‍රමිතියෙන් උසස් ඖෂධ නිෂ්පාදන විදේශීය වෙළෙඳපොළ වෙත යොමු කිරීම හරහා රටට නව විදේශ විනිමය ආදායම් මාර්ග විවෘත කරගැනීමට ද මෙහිදී අපේක්ෂා කෙරේ. ඒ අනුව මාලදිවයින, ටිමෝර්-ලෙස්ටේ ඇතුළු කලාපීය රටවල් වෙත ඖෂධ අපනයනය කිරීම සඳහා වන සාකච්ඡා මේ වන විටත් ආරම්භ කර ඇති අතර, ජාත්‍යන්තර ප්‍රමිතීන්ට අනුකූල මෙවැනි දේශීය නිෂ්පාදන යාන්ත්‍රණ ශක්තිමත් කිරීම මඟින් ශ්‍රී ලංකාව ඉදිරියේදී කලාපීය ඖෂධ නිෂ්පාදන මධ්‍යස්ථානයක් ලෙස ගොඩනැගීමේ පදනම සකස් වෙමින් පවතී.
