දීර්ඝකාලීන සහ අසාධ්‍ය රෝගී තත්ත්වයන්ගෙන් පෙළෙන පිරිස් වෙත නොමිලේ සත්කාරක සේවා සැපයීමේ අරමුණින් ඉදිකෙරුණු ‘කම්ෆර්ට් කෙයාර් හෝම්’ (Comfort Care Home) සහන සත්කාර මධ්‍යස්ථානය සෞඛ්‍ය අමාත්‍ය වෛද්‍ය නලින්ද ජයතිස්ස මහතාගේ ප්‍රධානත්වයෙන් යාපනය, චාවකච්චේරි, සරසාලෙයි ප්‍රදේශයේදී අද දින නිල වශයෙන් විවෘත කෙරිණි. රුපියල් මිලියන 350ක පෞද්ගලික හා රාජ්‍ය නොවන දේශීය විදේශීය ආධාර මත ස්ථාපනය කරන ලද මෙම මධ්‍යස්ථානය හරහා පෞද්ගලික කාමර 20ක්, පැය 24 පුරා ක්‍රියාත්මක වෛද්‍ය හා හෙද සත්කාර, ඔක්සිජන් සේවා මෙන්ම විශේෂිත පෝෂණ හා අධ්‍යාත්මික පහසුකම් සලසා දී තිබේ. සෞඛ්‍ය අමාත්‍යවරයාගේ උතුරු පළාත් විශේෂ නිරීක්ෂණ සංචාරයට සමගාමීව සිදුවූ මෙම විවෘත කිරීමත් සමඟ, කලාපීය ජනතාවගේ සෞඛ්‍ය සුබසාධනය උදෙසා කෙරෙන මැදිහත්වීම තවදුරටත් තහවුරු විය.
අමාත්‍යවරයාගේ මෙම සංචාරයේදී මන්නාරම, පේසාලෙයි සහ වෙඩිතලතිව් ප්‍රාදේශීය රෝහල් මෙන්ම පෙරියමඩු ප්‍රාථමික සෞඛ්‍ය සත්කාර ඒකකයන්හි පවතින ගැටලු පිළිබඳවද සෘජු අවධානය යොමුකෙරුණු අතර, සෞඛ්‍ය වෘත්තිකයින්ගේ නේවාසික පහසුකම් සහ ප්‍රාදේශීය මට්ටමින් බෝ නොවන රෝග හඳුනා ගැනීමේ පද්ධති ශක්තිමත් කිරීම පිළිබඳව රජයේ අවධානය යොමු විය. එමෙන්ම, පේසාලෙයි ප්‍රදේශයේදී සිදුවූ හමුදා ඩිෆෙන්ඩර් රථ අනතුරෙන් තුවාල ලබා මන්නාරම රෝහලේ ප්‍රතිකාර ලබන යුද හමුදා සෙබළුන්ගේ සුවදුක් සොයා බැලීමටද අමාත්‍යවරයා කඩිනමින් පියවර ගත්තේය. මෙම මැදිහත්වීම් සමස්ත උතුරු පළාතේම රාජ්‍ය සෞඛ්‍ය යාන්ත්‍රණය සහ යටිතල පහසුකම් නැවත සමාලෝචනය කිරීමේ සාධනීය ප්‍රවේශයක් ලෙස සෞඛ්‍ය ක්ෂේත්‍රයේ ඇගයීමට ලක්ව තිබේ.
නවීන වෛද්‍ය විද්‍යාවේ දියුණුව හමුවේ රෝග රැසක් සුවපත් කිරීමට හැකියාව ලැබුණද, අසාධ්‍ය තත්ත්වයේ පසුවන රෝගීන් සඳහා ජීවිත කාලය පුරා ගෞරවාන්විත සත්කාර ලබාදීමේ වගකීම මෙවැනි විශේෂිත මධ්‍යස්ථාන මඟින් සාර්ථකව ඉටුවනු ඇතැයි අපේක්ෂා කෙරේ. උතුරු පළාතේ ප්‍රාදේශීය සෞඛ්‍ය සේවාවන් කඩිනමින් යාවත්කාලීන කිරීමටත්, බෝ නොවන රෝග මර්දනය සඳහා වන විශේෂිත ජාතික වැඩපිළිවෙළ තවදුරටත් පුළුල් කිරීමටත් ඉදිරියේදී බලධාරීන් පියවර ගනු ඇතැයි විශ්වාස කෙරේ.
