රට තුළ සීග්‍රයෙන් ව්‍යාප්ත වන අල්ලස, දූෂණය, මත්ද්‍රව්‍ය උදුර සහ සංවිධානාත්මක අපරාධ මුළුමනින්ම තුරන් කරමින් අනාගත දරු පරපුර වෙනුවෙන් සුරක්ෂිත හා නීතිගරුක සමාජයක් ගොඩනැගීමේ ජාතික වගකීම රජය නොපසුබටව ඉටුකරමින් සිටින බව මහජන ආරක්ෂක අමාත්‍ය ආනන්ද විජේපාල මහතා ප්‍රකාශ කර තිබේ. කළුතර පොලිස් විද්‍යාලීය ක්‍රීඩාංගණයේදී පැවැති පොලිස් කුසලාන ජාතික ශිෂ්‍යභට කඳවුරේ වර්ණවත් විසිරයාමේ පෙළපාලිය අමතමින් අමාත්‍යවරයා පෙන්වා දුන්නේ රටේ අනාගත නායකත්වය භාරගැනීමට සිටින තරුණ පරපුර අපරාධවලින් මුදවාගැනීම සහ විනයගරුක පුරවැසියන් ලෙස ගොඩනැගීම වත්මන් පාලනයේ ප්‍රධානතම ප්‍රමුඛතාවක් වන බවයි.
පොලිස්පති ප්‍රියන්ත වීරසූරිය මහතා ඇතුළු ජ්‍යෙෂ්ඨ පොලිස් නිලධාරීන්ගේ සහ ශිෂ්‍යභට නිලධාරීන්ගේ සහභාගීත්වයෙන් පැවැති මෙම උත්සවයේදී දිවයින පුරා පිහිටි පාසල් 62 ක් නියෝජනය කරමින් ශිෂ්‍ය භටයින් 1,550 දෙනෙකු විසිර යන ලදී. එහිදී විශිෂ්ටතම දක්ෂතා දැක්වූ තෙල්දෙණිය ජාතික පාසලේ බාලක සැරයන් කේ. කේ. පී. පිහාන් සහ කුලියාපිටිය විශාකා බාලිකා විද්‍යාලයේ කේ. ඩී. වැලිවිටිගොඩ යන සිසු සිසුවියන් පිළිවෙළින් බාලක හා බාලිකා අංශවල දක්ෂතම ඝන සරඹ අණදෙන්නන් ලෙස සම්මානයෙන් පිදුම් ලැබූ අතර, පාසල් මට්ටමින් නීතියට හා විනයට ගරුකරන සන්නද්ධ යෞවනයක් බිහිකිරීමේ වැදගත්කම ද මෙහිදී අවධාරණය විය.
තරුණ පරපුර මත්ද්‍රව්‍ය සහ අපරාධ සංස්කෘතියෙන් මුදවාගනිමින් පාසල් පද්ධතිය තුළ විනය සහ නීතිගරුකභාවය ස්ථාපිත කිරීමට ගෙන යන මෙම ජාතික වැඩපිළිවෙළ ඉදිරියේදී සමස්ත සමාජයේම ස්ථාවරත්වයට සාධනීය ලෙස බලපානු ඇතැයි අපේක්ෂා කෙරේ. ඉදිරි කාලසීමාව තුළ පොලිස් දෙපාර්තමේන්තුව සහ ශිෂ්‍යභට බලකාය එක්ව දිවයින පුරා පිහිටි පාසල් ආවරණය වන පරිදි අපරාධ මර්දන හා විනය ප්‍රවර්ධන වැඩසටහන් තවදුරටත් පුළුල් කිරීමට නියමිත අතර, එය නීතියේ ආධිපත්‍ය සුරකින සුරක්ෂිත ශ්‍රී ලංකාවක් ගොඩනැගීමේ ගමනට මහත් ශක්තියක් වනු ඇත.
