දිවයිනේ ප්‍රදේශ රැසකට බලපා ඇති අධික වර්ෂාපතනය හමුවේ දැදුරු ඔය, රාජාංගණය, කුකුළේ ගඟ සහ කලාවැව යන ජලාශවලින් ජලය මුදාහැරීම සිදු කෙරේ.
දැදුරු ඔය ජලාශයේ වාන් දොරටු අටක් අඩි දෙක බැගින් විවෘත කර ඇති අතර, තත්පරයකට ඝන අඩි 10,400ක ජල ප්‍රමාණයක් දැදුරු ඔයට මුදාහැරෙන බව වාර්තා වේ.
රාජාංගණය ජලාශයේ වාන් දොරටු හයක් විවෘත කර ඇති අතර, කලා ඔයට තත්පරයකට ඝන අඩි 3,800කට අධික ජල ප්‍රමාණයක් මුදාහැරෙයි. එම ප්‍රමාණය තවදුරටත් ඉහළ නැංවීමට අපේක්ෂා කර තිබුණද, එය වර්ෂාපතනය සහ ජලාශයට ලැබෙන ජල ප්‍රමාණය මත වෙනස් විය හැකිය.
කුකුළේ ගඟ ජලාශයේ එක් වාන් දොරටුවක් විවෘත කර ඇති අතර, විදුලි උත්පාදනය සඳහා පිට කරන ජලය ද සමඟ කුඩා ගඟට තත්පරයකට ඝන මීටර් 93ක ජල ප්‍රමාණයක් මුදාහැරෙන බව සඳහන් වේ.
මේ අතර, කලාවැවේ ජල මට්ටම ඉහළ යාම හේතුවෙන් එහි හදිසි වාන් දොරටු දෙක අඟල් හය බැගින් විවෘත කර තිබේ.
දැදුරු ඔය සහ කලා ඔය ඇතුළු අදාළ ගංගා හා ඔය ආශ්‍රිත පහත්බිම්වල ජනතාවට ජල මට්ටම් වෙනස්වීම් පිළිබඳව විමසිලිමත්ව සිටින ලෙස දැනුම් දී ඇත.
වාරිමාර්ග දෙපාර්තමේන්තුව සහ ආපදා කළමනාකරණ අංශ නිකුත් කරන නිල නිවේදන අනුව කටයුතු කරන ලෙස ජනතාවට උපදෙස් දී තිබේ.
